Шернур район Кугу Мушко ялыште Тымбаршевмытым спортсмен еш семын палат.
Но нуно вес сомылымат шуктат. Теве, мутлан, Борис Николаевич ончыч пу дене тӱрлӧ фигуркым пӱчкеден. Капка ончылно шогышо пу левым ялысе кажне еҥ ужын докан. А кызыт еш оза вес пашалан кумылаҥын. Ынде теле еда Йӱштӧ кугыза ден Лумӱдырым я тӱрлӧ янлыкым лум дене ненча. Тидлан Анна пелашыже ден Евгений эргыже (фотошто) полшат. Тений лу утла янлыкым ыштеныт: урым, маскам, драконым, слоным, йӱксӧ-влакым, ӱшкыжым, тигрым да молымат. Окна ончылнышт пуйто йомак тӱня! А ял калык, кажне кечын гаяк толын, фотом ыштен кая.
– Ты пашам ышташ эн ончыч уныка-влак кумылаҥден шогат. Ондак У ийлан ыштена ыле, но тений лум варашрак толын, сандене ты сомылат шӱкалалтын. Изирак эргына, Женя, лумым шӱкен шынден, ора кугу. Тыге иктаж-мом ышташ кумыл лекте. Эрге лумым чумыра, пелашем нӧрта, а мый ыштем, –палдарыш Б.Тымбаршев.
Еш архив гыч налме фото.
