Ты томашалан ынде ятыр ий эртен. Йогор дене изи годсек кугу йолташ лийынна. Но тудо аварийыш логалын колен. Садлан саде корно дене кудалышташ ом йӧрате. Тушеч эртыме годым эре йолташем шарналтем.
Ик теле кечын саде корно дене кудалме годым Йогор ушышкем тольо. Аварий лийме кечын йолташем пелен шинченам. Игече ночкырак ыле, лум лумын. Кас. Корно яра. Йогор писынрак мӧҥгыжӧ миен шуаш шонен, газыш чотрак тошкалын. Кенета машина шолашкыла лупшалте. А ваштареш – фуро. Вара – эмлымвер. Тетла нимом ом шарне. Помыжалтмеке, Йогорын колымыж нерген пален налынам.
Адак – тиде корно, но ынде рульым шке пӱтырем. Лум, пычкемыш туткарым шарныктарат. Йолташемын шӱгарыштыже шукертак лийын омыл, намысын чучын колтыш. «Йогор, лишыл жапыштак тый декет миен толам», – йӱкынак ойлем. Кенета омо темдаш тӱҥале, шинча кумалтеш. Мален колташ огыл манын, радиомат кугунрак чӱктышым. Воштончышыш ончальым, шӱмем утыр кыраш тӱҥале: воштончышышто шеҥгел сиденьыште шинчыше Йогорым ужым. Савырнен ончальым – сиденьыште иктат уке.
Шинчамлан коеш, очыни, шоналтышым. Тиде Йогорак гын, молан мыйым лӱдыкташ шонен пыштен? Пеленже наҥгайынеже огыл дыр. Тыге, жапын-жапын воштончышыш ончен, икмыняр меҥгым кудальым.
Шинчам чотрак да чотрак кумалтеш. Чарналтен каналтыман. Но тыште корно аҥысыр. Изиш торашкырак кудалаш кӱлеш. Кенета машинаште йӱштын чучын колтыш. Янда кочыртатымым кольым. «Окнамже кузе почылтын?» – лӱдын шоналтышым да ырен кайышым, корным чот эскерем. Мо ышталтмым умылен ом керт, шонымем дене Йогорым поктем. Адак шинчам темда. Ны ончылно, ны шеҥгелне ик машинат уке. «Ит мале, ит мале!» – шокта пылышемлан. Шинчам почым, воктенем Йогор шинча. Чот сырен, «Ит мале!» – кычкыра адак.
Рульымат колтенам улмаш. Ваштареш кугу фуро толеш. Рульым писынрак савыральым да шке полосашкем логальым. Йогор воктечем йомын. «Ит мале» манмыже йӱксолныш гай тораштырак да тораштырак шокта. Шке семынем «Тау, Йогор» манын вудыматем. Вес кечынак йолташемын шӱгарышкыже миен толынам. Илышем утарен кодымыжлан эре тауштем.
Т.Денисов.
Морко район.