Кызыт тротуар дене ошкылашат огеш лий, велосипед, самокат, гироскутер дене чот кудалыштыт. Нунын дене пайдаланыме годым иктаж правилым шотыш налман мо?
Светлана.
Йошкар-Ола.
Марий Эл Республикысе исправительный колонийлаште законым шуктымым тергыме шотышто Йошкар-Ола прокуратур умылтара:
– Россий Правительстве Корно правилыш вашталтышым пуртымым пеҥгыдемден. Тушто электросамокат, гироскутер, сегвей, моноколеса да двигателян моло тыгай устройство дене пайдаланыме нергенат ойлалтеш. Тыгай устройство-влак ик мут дене «индивидуальный мобильность средства-влак» (СИМ) маналтыт да посна правовой статусан улыт. Тыглай самокат ден роликан коньки СИМ коклаш огыт пуро, тугай дене коштшо-влак ондакысе семынак йолешкылан шотлалтыт. Вашталтыш 1 мартыште вийым налын.
СИМ дене пайдаланыме годым
тыгай правил-влакым шотыш налман:
тыгай устройствыла дене шагатыште 25 километр марте писылык дене гына кудалыштман. Тыгодым тротуар, велосипед да йолешкылан корно дене 35 кг деч неле огыл СИМ дене гына кудалаш лиеш;
кеч-могай нелытан электросамокат дене кугорнын пурла тӱржӧ дене кудалыштман. Но тидым 14 ияш деч кугурак еҥ-влак гына ыштен кертыт, тунамат тугай корно ужашлаште, кушто эн писынже шагатыште 60 километр писылык дене кудалаш лиеш. Тыгак кугорно дене велосипедист-влак кудал кертыт. Корно дене кудалышташ манын, самокатын але вес устройствын тормозной системышт, йӱк сигналышт да ош ден йошкар тӱсан фар-влак лийшаш улыт;
шым ияш марте йоча-влак СИМ дене кугыеҥ дене пырля гына кудалшаш улыт;
йолешке-влакын СИМ оза-влак деч корнышто правашт кугурак, садлан СИМ дене кайыше-влак тидым шотыш налшаш улыт. Корнывожышто, пешеходный переходышто СИМ оза йолешкылан корным пуышаш;
автомобиль оза-влак воктен улшо территорий гыч кудал лекме да корно гыч кораҥаш шонымо годым СИМ оза-влаклан корным пуышаш улыт.
Корно знак
СИМ дене кудалыштмым посна корно знак регулироватлышаш. Тудо посна корно ужашыште кудалаш разрешитлымым, чарак улмым але кудалаш чарымым ончыктен кертеш. Знак-влакым вераҥдыме шотышто решенийым верысе кучем корно инфраструктурым шотыш налын приниматла.
Моло вашталтыш
Ончымо пунчал почеш тыгак ПДД-шке моло вашталтышымат пуртымо. Мутлан, «направляющий островок» да «лӱдыкшыдымылык островок» манмылаште кудалаш, чарнаш да шогаш чарыме.
Кок у корно знакым пеҥгыдемдыме. Иктыже электромобильым зарядитлаш лиймым ончыкта, весыже автобус-влаклан кудалаш чарыме нерген ойла (маршрут почеш кудалше общественный транспортлан да школ автобуслан тиде знакым ончыман огыл). Оксам тӱлыман да инвалид-влаклан парковко-шамычым ончыктышо знак-влакын сыныштым вашталтыме (икымшыштыже Р буква воктене оксам сӱретлыме, а кокымшыштыжо инвалидым стилизоватлен ончыктымо).
Эше ик у вашталтыш – оксам тӱлыман да яра парковкын зоныштым визуально ойырымаш. Нине зоно-влак канде да ош линий-влак дене ончыкталтыт.