27 сентябрь – Воспитательын кечыже
Шукерте огыл Бурятий Республикын рӱдолаштыже – Улан-Удэште – «Шочмо йылмым да литературым эн сайын туныктышо» профессионал мастарлык шотышто Российысе конкурс лийын. Марий Элын чапшым тушто кок участник арален. Иктыже – Шернур посёлкысо «Колокольчик» йочасадын воспитательже Надежда Николаевна Милютина.
Изиж годымак кӧ лийшашым пален
Надежда Николаевна Шернур посёлкышто марий ешыште шочын-кушкын. Ава ден ачаже икшывышт дене изинек шочмо йылме дене мутланеныт, марий йӱлам шуктен шогаш, тӱвыранам аралаш туныктеныт.
– Йоча пагыт– айдемын илышыштыже эн весела, чевер да оҥай жап. Лач тиде жапыште икшывын шке илыш умылымашыже шочеш. Тыгай годым воктене умылышо, сай ден осалым чын умылтарен моштышо еҥ лиеш гын, йоча ончыкыжым илыш корнышто пеҥгыдын шогаш тунемеш. Мый ача-аван йӧратымашыштым шижын кушкынам. Нуно марий улмына дене кугешнаш, шочмо йылме дене вожылде мутланаш, поян историйнам, тӱвыранам аралаш туныктеныт.
Йочасадыш коштмо годым воспитателем-влак пеш поро лийыныт, шуко шинчымашым пуэныт. Тачат нунын шӱргывылышыштым да лӱмыштым шарнен илем. Нунын сӱретлен, шун гыч тӱрлым ненчен моштымыштым эре йӧратен да кумыл нӧлтын онченам. Чучын, пуйто воспитатель чыла ыштен мошта. Иктаж-могай неле ситуацийыш логалынам гынат, лӱдын омыл, мый паленам: воспитатель-влак полшат, чын корныш виктарен колтат.
Йоча пагытысе шуко эн сай шарнымашем лачак коштмо да кызыт тушто пашам ыштыме йочасад дене кылдалтыныт. Кугу таум воспитателем-влаклан ойлынем. Нуно педагог профессийым йӧраташ туныктеныт, шкешт гай лияш кумылаҥденыт. Сандене изиэм годымак шканем туныктышо пашам ойыренам, – каласкала Надежда Николаевна.
Н.Милютина школыш коштмо годымжат шонымашыжым вашталтен огыл. 11 класс деч вара тудо МарГУ-ш Тӱҥалтыш образований педагогике да методике направлений дене тӱҥалтыш класслам туныктышо специальностьлан тунемаш пурен. А дипломым налмеке, 2012 ийыште, саде йочасадышкак пашаш толын.
Йӧратыме паша куаным конда
Надежда Николаевна пашашкыже уло чонжым пышта. Тудын шонымаште, кажне йоча шкешотан.
– Мый воспитатель семын йоча сай да пашам ышташ йӧратыше айдеме лийже манын тыршем. Йочасад – йомакысе гай поро тӱняш омса. Тыште эре мо-гынат вашталтеш, шке закон ден правил улыт. Тудым шуктыман. А тидлан тӱткӧ, поро кумылан лийман, йочам йӧратыман да тудын дене пырля шкаланат вияҥман, тӱрлӧ шӧрыныштӧ шуаралтман.
Йоча-влак дене пашам ышташ пеш оҥай. Марий йылме дене модмо занятийлам эртарем. Икшыве изинек шочмо йылмыжым, калыкшым, тудын тӱвыра ден сымыктышыжым аклен да йӧратен кушшо манын шонем. Йочасадыштына национальный лукым йӧнештарыме. Тушто калык вургеман курчак-влак, дидактический модыш-влак ончыкталтыныт. Тылеч посна изирак тоштер пашам ышта. Тушто марий калыкын илыш-йӱлаж дене палдарена, – ойла воспитатель.
Н.Милютина пашажым куанен ышта. Шке мастарлыкшым, профессионал улмыжым тӱрлӧ конкурсышто ончыкта. Мутлан, шукерте огыл Улан-Удэште эртаралтше «Шочмо йылмым да литературым эн сайын туныктышо» конкурсышто участвоватлен.
– Организатор-влак конкурсым кугу кӱкшытыштӧ эртареныт. Таҥасымаш 40-ше №-ан школышто да «Родничок» йочасадыште лийын. Ты конкурс тӱрлӧ регион гыч толшо коллеге-шамыч дене опыт дене пайлалташ йӧным ыштен. Чылан уста улыт. Вашла полшен шогенна. Наставникем Надежда Николаевна Четкарёва да йочасадын усталык группыжлан поснак кугу таум ойлем, – манеш Н.Милютина.
Надежда Николаевна деч чын воспитатель могай лийшаш манын йодмемлан тыге вашештыш: йочам йӧратышаш. Кажне ньоган личностьшым пагалышаш, сеҥымашке шуэш манын ӱшанышаш. Икманаш, йочалан поро йолташ лийшаш.
Н.Милютинан еш альбомжо гыч налме фото.