Ирина Владимировна Сорокина Кужэҥер район Руш Шой кыдалаш школышто педагог-психологлан 10 ий ышта. Шке пашаштыже тӱрлӧ методикым кучылтеш. Психолог йоча-влаклан веле огыл, туныктышо-шамычланат полша.
Йӧратыме паша
Ирина Владимировна Руш Шой школышто тунеммыж годымак психолог лияш шонен да ты профессийым Марий кугыжаныш университетыште налын.
Тудо каласкала:
– Школыштына 131 йоча тунемеш. Кажныжын чонжым тургыжландарыше йодыш-влак улыт. Йоча-влак тыршен тунемыт. Но икшывын чырыкыште икте деч шукырак предмет дене «кокытан» отметке лектеш гын, туныктышо каҥаш (совет) йоча дене мутлана да отметкым тӧрлаташ жапым пуа.
Мый йоча дене тӱрлӧ анкетированийым, консультацийым эртарем. Туныктышо-влак денат тыгак пашам ыштем. Южо еҥ психологлан чон шижмашыжым, тургыжланымашыжым каласкала. Тидын дене чонжым лыпландара. А южо еҥ каҥашым йодын толеш. Ме, кугыеҥ-влак, чылажым ойлаш лӱдына але вожылына. Йоча-влак утларак чоныштым почын моштат. Сандене нунын дене пашам ышташ куштылгырак. Ӱдыр-рвезе-влак шылтыде чыла ойлат. Тыгай годым полышымат пуаш вашке лиеш. Психолог семын мылам ӱшанат. Тунемше-шамыч дене пырля тургыжландарыше йодыш-влаклан пырля вашмутым муына. Нелылыкым сеҥаш полшен кертам гын, куанем.
Усталык шӱлышан психолог
Ирина Владимировнан чонжым марий сем вӱчка. Тудо Марий Шой тӱвыра пӧрт пеленысе «Кумылоҥгыр» ансамбльын участницыже.
–Ансамбльна 15 ий ончыч шочын. Кажне репетицийыш уло кумылын коштам. Ансамбльым авам Галина Михайловна Петухова вуйлата. А ачам Владимир Николаевич Петухов – уста гармонист. Садлан йоча годымак марла мураш-кушташ тунемынам, – манеш И.Сорокина.
Самырык психолог тӱрлӧ тӱвыра фестивальыште, конкурсышто мастарлыкшым ончыкта. Тений «А ну-ка, ӱдыр-влак» конкурсышто участвоватлен. Тудо костюм дефилеште поснак ойыртемалтын. Видеокассет плёнко гыч шке кид дене тувырым ыштен. Ирина конкурсышто «Шошо» номинацийыште сеҥышыш лектын.
Теве могай марий психолог – уста, шке пашам йӧратыше, пӱртӱсым аралыше.
И.Сорокинан альбомжо гыч налме фото.