Йоча пагыт – ик эн йӧратыме, мондалтдыме, йомартле жап. Южо икшывын тудо моткоч веселан эрта, чонеш волгыдо кышам кода гын, весын кумылжым волта, южгунам шинчавӱдымат луктеш. Марий Турек район Сабактӱр ялеш шочын-кушшо, кызыт Йошкар-Олаште Строительно-промышленный техникумышто 1-ше курсышто тунемше Дмитрий Маландин тидым сайын пала. Вет тудлан изинек шочмо ача-ава деч посна кушкашыже логалын. 12 ияш улмыж годым, пиалешыже, Параньга район Кугу Осиялыште илыше Петровмыт ешыште илаш тӱҥалын.
Марий Турек гыч – Параньгаш
Марий Турек кундемыште илыме пагытшым Дима сайын шарна, но тидын нерген ойлаш огеш йӧрате, вет тудо чонешыже кочо палым коден.
Рвезе ныл эрган ешыште шочын-кушкын. Нунын кокла гыч Дима – кумшо йоча. Шольыжо ден изаже-влак кушкын шуыныт, тӱрлӧ верыш шаланен пытеныт.
Диман тунемме пагытше Косолап специальный школ-интернатыште эртен. Тушко тудо 1-ше класс гычак кошташ тӱҥалын. Икмыняр ий гыч ачаже ӱмыр лугыч лийын, аважым йочам ончымо права деч посна коденыт. 2017 ийыште 12 ияш Димам Параньга район Кугу Осиял гыч Эльвира Филимоновна ден Людовик Николаевич Петровмыт ончаш налыныт.
У ешыште ласка
– Йоча жапем куштылгын эртен огыл. Авам подылаш йӧрата ыле. Изам-влак да шольым дене пешыже ом мутлане. Кугуракше Коля авам пелен ила, Валера дене ик техникумышто тунемына, а эн изиже, Слава, приёмный ешыште кушкеш.
У ешыште мыйым порын вашлийыныт, вате-марийын кум икшывышт дене кылым вашке муынам, у ешлан писын тунем шуынам. Пошкудо рвезе-влак коклаште шуко йолташым муынам.
Но мый Кугу Осиялыш йӧршешлан куснен омыл. Косолап школ-интернатешак тунемаш кодынам. Лач кужу канышлан гына ешыш миен коштынам. Приёмный авам клубышто пашам ыштен, приёмный ачам вахте дене кугу олалашке кудалыштын.
Нуным ала-молан авай ден ачай манын кертын омыл. Кокай да чӱчӱй манынам. Чаманаш логалеш, икмыняр ий ончыч приёмный ачай илыш дене чеверласен. Тудо поро кумылан пӧръеҥ ыле. Кокай – поро, сай ӱдырамаш. Нуно мыйым шот дене воспитатленыт, чын корно дене ошылаш туныктеныт.
Ялыште паша шуко. Сандене сурт сомылка ден пакча паша дене эре полышкалаш тыршенам. Еш дене жапым пырля эртаренна, – мане Дима.
Тунемеш, спорт дене кылым куча
Строительно-промышленный техникумышто Дима ынде кокымшо специальностьым налеш. Кызыт Моркышто практикым эрта.
– 18 ияш улмем годым каменщиклан тунем лектым, кызыт столяр профессийым налам. Кок профессийжат илышыште кӱлешан улыт. Тунемаш мылам пеш келша. Группышто 13 студент улына, – ойла Д.Маландин.
Дима изинек спортлан кумылан кушкын. Косолап школ-интернатыште тунеммыж годым волейболла, баскетболла талын модын, куштылго атлетике дене заниматлен, ече дене коштын. Школысо, районысо тӱрлӧ соревнованийыште ойыртемалтын.
Техникумыштат спорт дене кылым куча. Тудо мини-футболла шуко модеш. Кодшо ийын техникумын командыже дене Сочишке, Нижний Тагилышке, Озаҥышке миен коштын. Пытартыш жапыште регбилан кумылаҥын.
Куанен мошта
Кугу Осиялыште илыме жап рвезын ушешыже волгыдо шарнымашым коден. Тыште тудо ешын могай лийшашыжым тӱрыс умылен, ача-аван чон шокшыжым, йӧратымашыжым шижын шуктен. Суртоза ден озаватын эргыже да кок ӱдыржӧ Димам шочмо шольо олмеш ужыныт. Тачат икте-весе дене пеҥгыде кылым кучат.
Икмыняр ий ончыч Диман приёмный аваже Йошкар-Олашке илаш куснен. Рвезе кызыт тудын дене пырля ила.
Дималан эртыше пагыт чонеш кышам коден гынат, тудо илышлан куанен мошта.
– Шочмо авамлан сырен ом кошт. Мо лийын, тудо эртен. Тӱҥжӧ – кызыт чыла сай. Приёмный ача-авамлан илыш корныш лукмыштлан тауштен илем, – иктешлыш рвезе.
Дима пачерым налаш черетыште икмыняр ий шога. Тудлан сайын тунем пытараш да ончыкыжым оксан паша верым муаш тыланена.