Олюк тачысе касым пыкше вучен шуктыш. Аважын лӱштен пурымо шӧрым вашкен подыльо. Ӱпшым, кандалге тувыржым тӧрлыш, пӧртӧнчыкӧ лекте. Тугак вашкен, йолжым кӱкшӧ таганан туфльышко шуралтыш. Уремыште тымык, южо почылтшо окна гыч каслан шолтымо кочкыш тамлын пушлана. Олюк капка воктене тышке да тушко ончышто, эҥер воктеке ошкыльо. Ваштарешыже шем ӱмылка тарваныш.
– Кужун вучыктем? – ӱдыр рвезе ӱмбаке титаканла ончале.
– Мый вучем, вучаш шочынам, – шыргыжале Виктор да ӱдырым кыдалже гыч ӧндале. Нуно, эҥер гоч вончен, вес уремышке лектыч, палисадник воктенысе теҥгылышке шинчыч.
– Виктор, ончал! Каваште мыняр шӱдыр! Иктыже – мыйын, весыже – тыйын, – веселан пелештыш Олюк.
Чынак, шуко шӱдыр коклаште кокытшо поснак йыгыре йолгат. Кӧгӧрчен курык шеҥгечын сорла тылзе койылалтыш, пуйто тудат ӱдыр ден рвезым шыргыжалын саламлыш.
Уремыште кечывал кече гае волгыдо лие. Олюк воштыл колтыш. Кенета кынелын шогале, Викторым кидше гыч кучыш, коктын ошкыльыч.
…Сылне кеҥеж деч вара тыгыде йӱран шыже, йӱштӧ теле, мотор шошо эртенат кайышт. Тиде жапыште Олюкын илышыже шукылан вашталте. Тудын йӧратыме
Викторжо кугу сӱан дене пошкудо ял гыч «дипломан сар шӱшпыкым» кондыш. Тиде кече деч вара Олюкын йыҥгыр йӱк гай воштылмыжо, вараксим гай вычыматымыже ышт шокто. Матра кокай ӱдыржын ӱмбаке ончалешат, кугун шӱлалта. Олюкын чурийже шыже йӱд дечат пычкемыш. Кече касвелышке тайныш. Олюк кандалге тувыржым чиен, шӱлыкын ял мучашке куэрла деке ошкыльо. Пеле кошкаш тӱҥалме пушеҥге воктеке тольо. Чытен ыш керт, шинчавӱдшӧ кышкалтын лекте. Ӱдырын ойган шинчаже волгыдо каваште мужыр шӱдырым кычалеш. Лывырге кидше вичкыж куэм ниялткала. Пеле йӱкын пелештыш: «Сӱан толеш, сӱан толеш, таҥем вес ӱдырым налеш…»
Олюк кечывалым эше чыта, кастене поснак йӧсӧ. Тачат, пычкемышалтмек, тӱгӧ лекте, эҥер вес велке кужун ончен шогыш. Тушкыла ошкылаш ыш тошт. Пӧрт воктенысе теҥгылыш шинче, вуйжым сакыш. Но уэш шинчажым йӱд кавашке виктарыш. Шӱлыкаҥын ончем йӱд кавашке, Чуриет шарналташ мый тыршем. Шӱм кӧргем гыч лукташ пеш ом вашке, Угыч пӧртыл толметым вучем.
…Но тиде вучымаш пеш кужу жап шуйныш. Ик кечыла эртен кайыше 20 ий вичкыж кыдалан Олюкым йӧршын вашталтыш.
Мотор кукшо шыже кечын кугорно дене шкет ӱдырамаш ошкылеш, йырваш шӱлыкын ончыштеш. Кидыштыже – пеледыш аршаш. Кайышаш корно кужу гынат, пеш ок вашке. Теве тудо шӱгарла деке толын шуо. Лап лие, кидше дене йошкар шун курыкым шыман ниялтыш, шинчавӱдшӧ лекте. Самырык годсо жапшым, йӧратыме таҥжым шарналтыш. Яндар кавашке вуйжым нӧлтале, марий йӱла почеш шындыме кок куэм ужо. Саргайыше южик лышташ, мардежеш кӱрлын, шӱгар ӱмбаке эркын возеш…
Ольга Павловна кас лишеммым пыкше вучен шуктыш. Пӧрт мучко коштын савырныш. Шинчен шинчымыжат, шоген шогымыжат ок шу. Пычкемышалтмеке, уремыш лекте. Шинчажым йӱд кавашке виктарыш. Шуко шӱдыр коклаште
мужыр шӱдырым кычале. Но арам: кокыт олмеш иктым веле ужо да шинчавӱд йӧре пелештыш:
– Пытартыш мутет могай лие? Пытартыш шӱлышет кузе лекте?
Зинаида ТИМИРБАЕВА-АРШАШ.
Пошкырт кундем,
Нефтекамск ола.