Могай тудо чын пӧръеҥ? Мыйын шонымаште, чын пӧръеҥ — йӧратыме пелашыжлан — сай эҥертыш, икшыве-влаклан — пример, шке элын патриотшо. Лачак тыге ойлаш лиеш Морко районын эргыже, кызыт СВО-н участникше Авенир Ефремов нерген.
Тудо 2022 ий 15 октябрьыште мобилизаций почеш специальный военный операцийыш каяш повесткым налын. Марий пӧръеҥ кокытеланыде элым аралаш каен. Авенирым Йошкар-Олаште ешыже, пелашыж ден кок шочшыжо сеҥымаш дене вучат. А.Ефремов нерген Анастасия ватыж дене мутланышна.
— Пелашем Морко район Шордӱр ялыште шуко шочшан ешыште кушкын. Ача-аваже куд икшывым ончен куштеныт. Авенир – кудымшо. Изинек мутым кулыштшо, кугурак-влакым пагалыше, ответственный, ача-аважлан эҥертыш лийын. Пелашем дене ешым 2016 ийыште чумыренна. Кок икшывына: Артем эргына ден Маша ӱдырна – кушкыт, — ойла Анастасия.
— СВО-ш кайыме деч ончыч Авенир могай пашам шуктен?
— Пелашем шке жапыштыже Йошкар-Оласе аграрно-технологический колледжым электромонтер специальность дене тунем пытарен. Чоҥалтше «Ясная поляна» микрорайонышто электриклан пашам ыштен.
— СВО-ш каяш повесткым налмеке, могай шижмаш чондам авалтен?
— Пелашем — пеҥгыде койыш-шоктышан, чын пӧръеҥ.Тудо шылын кошташ шонен огыл. Мобилизаций почеш специальный военный операцийыш каяш повестке толмеке, мый чот шортынам, колтымем шуын омыл. Но мом ыштет, илыш тыгай.
Мый шкетын кок икшыве дене кодым. Тунам эргым 5 ияш ыле, а ӱдырна – идалыкат пелаш веле. Да йоча-шамычын эн оҥай жапышт: икымше сҥымашышт, йочасадыште выпускной, икымше класс — ачашт деч посна эртен
Неле лийын гынат, шкемым кидыш налынам. Умылем: Авенирлан эшеат неле. Мый тудлан морально полышым пуаш, кумылжым нӧлташ тыршем. Нойымемым ом ончыкто.
— Кызыт пелашда могай верыште?
— Повесткым налмеке, Авенир кум тылзе Ульяновск олаште военный тунеммаште лийын, спецоперацийыш каяш ямдылалтын. Чара вуян улмыжлан кӧра «Ленин» позывнойым пуэныт.
Вара салтак-влакым Луганск Республикыш колтеныт.Тушто пелашем миномётный взводысо штурмовой отрядышке логалын. Кызыт Белогоровка посёлко воктене служитла. Январь марте кугурак миномёт наводчик лийын. Ынде — орудий командир. Авенир «СВО участник», II степенян «За воинскую доблесть» да «За отвагу» медаль-влак дене палемдалтын. Конешне, нине награде-влакым налаш куштылго огыл. Да наградылан огыл тудо тушто кредалеш, а элна, калыкна, еш верч шке вийжым ок чамане.
Кажне кечын манме гаяк нелылыкым вашлиеш. Тушто улшо чыла салтак тидын дене тӱкна. Но волгыдо уш, пеҥгыдылык чыла йӧсылыкым сеҥаш полшат. Пелашем ончылно шындыме задачым мучаш марте шукташ тырша. Пел корнеш нигунам ок шогал. Тидланак пырля служитлыше салтак йолташыже-влак тудым аклат да пагалат.
— Авенирын илыш ончалтышыже вашталтын?
— Кажне салтакын, колымашым ужмеке, илыш умылымашыже вашталтеш. Шукынжо айдеме семын кушкыт, мудреч лийыт, илышым утларак аклаш тунемыт.
— Йоча-влаклан ача ок сите докан?
— Чот вучат. Пелашем – сай ача. Яра жапшым икшывыже-влак дене пырля эртараш тыршен. Кенежым пӱртӱс лоҥгаш, ер воктеке канаш коштмо. Телым курыкышто тюбинг дене мунчалтыме. Эргынам вич ияшыже улмыж годым шахмат дене модаш туныктен. Йоча-шамычна ачашт деч посна йокрокланат, но нуно умылат, ачашт — герой, тудо чын верч кредалеш.
— Пытартыш гана кунам пелашда дене вашлийында?
— Тылзе ончыч тудын взводшым полигоныш луктыныт. Мый шуко шоныде туддеке каенам. Вашлиймына годым когыньнанат шинчана пиал дене чолгыжын. Авенир мыйын толмо дене пуйто мӧҥгыштӧ улмыла шкенжым шижым. Пӧръеҥ-шамыч виян улыт гынат, нунат чон шокшым, мӧҥгысӧ уютым шижнешт.
Ӱшанем, вашка тыныс кава лиеш. Ӱдырамаш-влак пелашыштым, ава-влак эргыштым, йоча-шамыч ачаштым вашлийыт. Авенир пелашемым, илыш эҥертышем, чот йӧратена да тазам да илышым вучена! Тек тудым да моло салтакым Юмо, суксо аралат!.
Еш альбом гыч налме фото.