Туныктышо шинчымашыжым дене тунемше-влак дене пайлалтеш. Но тидлан тудо шкежат кажне кечын уш-акылжым пойдара, илыш дене тӧр кая. Сай туныктышо кажне йоча дене кылым муын мошта, шке предметшым йӧратыкта.
Туныктышо лияш сай, но, чаманен каласыман, самырык тукым ты профессийыш шагалын толеш, поснак тиде районлаште палдырна. Амалже – изи пашадар да кугу ответственность. Самырык специалистым ялысе школлаш кондаш манын, кугыжаныш могырым «Земский учитель» программым илышыш пуртымо. Тений Марий Элыште ты программе почеш ялысе, тыгак 50 тӱжем еҥ илыман оласе школлаш пашаш толшо туныктышо-влак 1 миллион теҥгеаш выплатым ик гана налыныт.
Шернур район Мустай ялын ӱдыржӧ Валерия Маковеева «Земский учитель» программыш ушнен. Самырык туныктышо Медведево район Руэм пос ёлкысо кыдалаш школышто математикым туныкта.
Валерия Владиславовна Шабдар Осып лӱмеш Мустай школышто тунеммыж годым педагог лияш шонен.
– Икымше туныктышем Галина Прокопьевна Медведеван надырже кугу. Тудо чыла тунемшым шке йочаж гай йӧратен. Поро шинчаончалтышыже, шыман мутланымыж дене икшывым тунемаш кумылаҥден. Тудын дене уло тӱням лӱдде шымлыме, йодыш-влакым пуаш ӧрмӧ огыл. Ме паленна, мыланна садак вашешта, сайын умылтарен пуа. Математикым, алгебрым, геометрийым туныктышем Надежда Васильевна Кузьминыхым моткоч пагалем да йӧратем. Тудо икымше урок гычак шке примерже дене чын туныктышо могай лийшашым ончыктен. Туныктышем, наставникем-влак, пашаланда, мудреч улмыланда да шке опытда гоч самырык-влакым туныктымыланда кугу тау, – манеш Валерия Владиславовна.
Мустай гыч Руэмыш
В.Маковеева школ деч вара 2018 ийыште МарГУ-ш математике ден физике профиль дене педагогике факультетыш тунемаш пурен. А дипломым налмеке, шочмо школышкыжо пашаш толын. Тушто кок ий физикым туныктен.
– Чонем оласе илышышке шупшын. Сандене ола воктенысе Руэм посёлкысо школыш пашаш толынам. Кызыт тушто математикым туныктем да 5-ше «Б» классын вуйлатышыже улам. Классышкем 25 йоча коштеш. Чылан уста, шуко ум палаш тыршыше улыт.
Мый, тӱрлӧ йӧным кучылтын, урокым эртарем. Ӱдыр-рвезе-влак дене опорный конспектым, докладым, презентацийым ямдылена. Тидыже чыла тунемшын шинчымашыжым келгемдаш полша, – каласкала Валерия Маковеева.
Самырык туныктышо шке пашаштыже нелылыкым ок уж, йӧратыме сомылем куаным веле конда, манеш. Лач кагаз паша дене ятыр жап шинчылтме нойыктара.
Куштылго нимогай пашаште уке. Илышыште тӱрлыжат лиеда. Кажне еҥын, жапын-жапын, а кӱлеш мо тиде мылам йодыш чонжым тургыжландара. Тыгай годым лишыл еҥ-влакын каҥашыштат полшен кертеш. Тыгай еҥлан Валерия Владиславовна ача ден аважым шотла. Нуно ӱдырыштлан тӱҥ эҥертыш улыт.
Иван Речкинын фотожо.