Йӧратыме ковам

Кажне йоча шке коча-коважым пагала да йӧрата. Мыят тыгак. Ковам Зинаида Егоровна Архипова тений февральыште 90 ийым темен. Тудым саламлаш родо-тукымна пешак шукын погыненыт ыле. Морко администраций гычат шерге пӧлек дене пагален толыныт. Зина ковам тидлан пешак чот йывыртен, тудлан тиде пеш кугу пиал лийын. Чаманен каласыман, 10 апрельыште йӧратыме коваем мемнам коден каен.


Ковам Морко районысо Алсола ялеш шочын. Пӱрымаш пелашым Кугорнӱмбал Шале ялыште вашлийын. Ковамын илыш корныжо пешак неле лийын. 10 ияш икшыве сарын неле жапшым эртен. Ачаже сар гыч сусырген пӧртылын. Неле чер деч вара 45 ияш аважымат поген пыштеныт. Кочкаш, йӱаш уке. Вич йоча тулыкеш кодын. Эн кугу ӱдырлан (коваемлан) паша пеш шуко логалын: колхозыштат, мӧҥгыштат, но тидым чыла чытен лектын. Таклан вет огыт ойло: «Тошто калык пеҥгыде лийын». Ковам илымыж годым эре тыге манеш ыле: «Авамын ӱмыржым илем ала-мо…» Мый шке ковамым эреак чоныштем, ушыштем шарнен илаш тӱҥалам. Тудын сайжым, поро кумылжым нигунамат ом мондо. Вет мыйын коваем эн чот поро да ныжылге лийын.

Стелла КУЗНЕЦОВА.
Морко район, Шӱргыял школ.