Шукыж годым салтак шомакым ойлымеке, ушышто вийвал, таза капкылан рвезын образше сӱретлалтеш. Но тыгай еҥ-влак радамыште ӱдыр-шамычат улыт, нунын кокла гыч иктыже Йошкар-Ола гыч Дарья Мамаева.
Шке кумылын
Дарья – кундемна гыч СВО-што участвоватлыше икымше ӱдыр. Специальный военный операцийыште кредалмыж годым лӱддымылыкым да патырлыкым ончыктымыжлан «За отвагу» медаль дене суапландареныт. Чулым да изи улмыжлан тудым СВО-што «Кнопка» манын лӱмденыт.
Йошкар-Олаште шочын-кушшо ӱдыр ончыч 10-шо номеран школышто шинчымашым поген, вара 29-ше номеран школышто МВД направлений почеш кадет классыш тунемаш пурен. Школ деч вара МОСИ-ште юристлан профессионал шинчымашым налын. Кокымшо курсышто тунемше Дарья Йошкар-Оласе следственный комитетыште следовательын полышкалышыжлан тыршаш тӱҥалын. Ӱдыр ӱмыржым МВД дене кылдаш, офицер лияш шонен. Но ыштен ончымеке, шонымашыже вашталтын. Туге гынат Мамаеван патриотизм шӱлышыжӧ йомын огыл. Тудо военно-патриотический клубышто шуаралтын: автоматым устан рончен-поген, дзюдо да самбо, рукопашный кучедалмаш дене заниматлен.
– Институт деч вара мемнан кундемыште верланыше военный частьыште служитленам. Тушто радиотелеграфист, связист лийынам. Тыге армий да службо нерген утларак пален налынам. Но ала-молан армийым эреак вес семын ужынам. Садлан ик жап служитлымеке, заводыш пашаш каенам. Лач тунам СВО тӱҥалын. Чонем шкенан салтак-влаклан полшаш ӱжын. Служитлыме опытем лийын, садлан тушко кузе каяш лиеш манын, йӧным кычалынам. Тидлан военкоматыш коштынам. Туштыжо медицине аланысе шинчымашым пеҥгыдемдыме документ деч посна налын огытыл. Варажым соцкылысе ик лаштыкыште «Ветераны» частный военный компанийын тӱшкаже шинчашкем пернен. Тудо добровольческий батальонлан шотлалтеш. Нунын дене кылым ыштымеке, мыйым СВО-ш ӱжыныт. Тыге 2022 ий кеҥеж гыч специальный военный операций кайыме кундемыште связистлан служитлаш тӱҥалынам, – каласкала Дарья Мамаева.
Связисткын пашаже – сай кылым ыштымаш
Землячкынан службыжо Харьковский область Изюм олаште тӱҥалын. Тунам августышто тушман-шамыч ты олам чыла могыр гычат авыреныт. Дарья да моло салтак-шамыч окружений гыч лектыныт.
– Тӱҥ пашамлан подразделений-влак коклаште сай кылым ыштымаш шотлалтын. Связист-шамычат виян да чулым лийшаш улыт. Вет нунылан неле техник дене ик вер гыч вес вере ятыр куржталаш логалеш. Сарыште тӱрлӧ ситуаций дене тӱкнаш логалын. Тушман-шамычын окруженийышт гыч лекмеке, мемнам Луганск областьысе Сватово олаш колтеныт. Тунам сентябрьыште тушто моткоч неле кредалмаш-влак каеныт.
Неле, кочо, кокланже чыташ лийдыме гынат, тидлан тунемат. Вет сарыш Шочмо элым, калыкым, йолташ-влакым аралаш каят. Тушто улмо годым, мӧҥгеш корно укем умылет, садлан пеҥгыде койыш-шоктышан лийман. Элым аралаш шонышо еҥлан уто талант огеш кӱл. Тӱҥжӧ – полшаш шонымаш, – манеш ветеран.
Контрактым подписатлыме деч ончыч ӱдыр, эн ончыч лишыл еҥже-влакын тыныслыкышт да ласка илышышт нерген шоненам, мане.
– Тушто, ончылно служитлыше-влак коклаште ӱдыр да рвезе-шамычым огыт ойыркале. Чылан икгай салтак улыт: ик семын кредалыт, ик шонымаш дене элын интересшым аралат, – палемда Мамаева.
Кокымшо шочмо кече
2022 ий сентябрьыште Дарья чот контузитлалтын. Ӱдырын шинчаже начарын уже, пылышыже эркын колеш. Чот сусыргымылан кӧра тачат давлений дене орлана. Илен кодмыжым тудо кокымшо шочмо кечыжлан шотла.
20 сентябрьыште эрдене ныл шагат эрталтымеке, Дарья да моло салтак-влак дислокаций верыштым вашталтыме амал дене корныш тарваненыт. Тушман ӱмбакышт «хаймарс» ракетым колтен. Тунам ятыр салтак пытен, сусырген, связист-шамычын уло техникышт пытен. А КамАЗ-штым ончалашат шучко лийын: уло технике локтылалтын. Землячкынан илышыжым оҥ кӱсеныште кийыше телефонжо утарен. Осколко Дарьян телефонышкыжо керылтын.
– Тунам шуко сай йолташемын ӱмыржӧ кӱрылтын. Чонлан чот йӧсӧ лийын. Вет ме ик совла гыч кочкын иленна, манаш лиеш. Кочо шарнымаш тачат чоным корштара.
Контузитлалтмеке, ик жап Луганск областьысе, варажым Ростовысо госпитальыште эмлалтынам. Кызытат шкенан эмлызе-шамычын эскерымашыштышт улам, – ойла землячке.
Патриотизм шӱлыш
Кызыт Дарья Мамаева самырык-шамычын патриотический воспитанийыштлан кугу тӱткышым ойыра. Йошкар-Оласе школлаште, йочасадлаште класс шагатым эртарымашке, тӱрлӧ мероприятийышке тудым чӱчкыдын ӱжыт. Герой землячкынам шукын палат.
– Ола урем дене эртымем годым ятыр палыдыме еҥ мый денем саламлалтеш. Тугеже кӧ улмемым палат манын шке семынем шоналтем да ваштарешышт пелештем.
СВО нерген тӱрлӧ передачым ончем, тушто могай ситуаций улмым эреак эскерем. Лиеш гын, тачат тунамсе семын тушко лектын каем ыле. Но тазалык лунчыргымылан кӧра огыт колто, – манеш патриот.
Дарья Мамаеван наградыже чын да чулым связист улмыжым пеҥгыдемда. «За отвагу» медальым землячкына суапле пашаж дене сулен. Наградым ӱдыр идалык тӱҥалтыште Марий Эл Вуйлатыше Юрий Зайцевын СВО-н ветеранже-шамыч дене вашлиймашым эртарымыж годым налын.
Ты медальыште кугу историй, мондалтдыме подвиг. Вет Марий кундемын изи «Кнопкыжо» тушманын кугу танкше-влакым пытараш полшен. Связисткын кӱлеш жапыште писын да чын данный-влакым пуымыж дене мемнан-шамыч ВСУ-н кок танкшым беспилотник дене вигак пудештареныт. Тидын дене тушманын цельжым кошартеныт.
Илышыште айдемым тӱжвач гына ончен аклыман огыл. Шукыж годым кугу подвигым кӧргӧ вий-куатан-влак шуктат. А тыгай еҥ-шамыч уло чон дене Шочмо элым да лишыл еҥ-влакым йӧратат. Тидланже пример – Дарья Мамаева.
Ӱдырын альбомжо гыч налме фото-влак.