Волжский районын ӱдыржӧ Елена Нестеренко (снимкыште) ятыр жап Италийыште ила. Эн ончыч тудо тушко пашам ышташ коштын гын, кодшо ийын тудо марлан лекте. Елена деч тачысе ситуаций нерген умылкалышна.
– Чынак, мемнан элыштына инфекций эн ончыч йӱдвелыштыла тӱҥалын. Шоненна: тиде тораште, тиде мемнан дене огыл. А вара кече почеш кече эртымеке, чынже денак умылет: тиде шучкылык тыштыла, воктенна коштеш. Ме курык коклаште илена, нигушко огына лек. Кочкышым ятыр жаплан налынна. Такшым ме пелашем дене диетым кучена, шагал кочкына. Нигӧ деке унала огына кошт, мемнан декат иктат ок тол.
Мый шке родо-тукымым ом лӱдыктӧ, кӧ йодын гын, чыла чыным гына ойлена. Юмылан тау, мемнан деке шучко чер толын огыл. Кодшо кечылаште вирус чот шарлен, но варажым тудо чакна манме уверат шоктыш.
Мыйын верч ида тургыжлане. Тӱҥ шотышто Италийыште ситуаций неле. Тидым телевизорышто ончыктымо гоч ужына. Шкем верч кызыт ом лӱд, Российыште мемнан элысе семынак ынже лий манын тургыжланем. Испанийыште Италий деч шучкырак, маныт. Европысо моло эллаште инфекций але шарла веле. Но тиде эрелан огыл, тудын мучашыже лиеш, но мыняр илышым наҥгая. Европысо медициныште тиде шучкылык ваштареш кучедалаш у технологий-влак полшат, шонем. А Российыште… Мый йочам ден уныкам верч лӱдам.
Притче
Е.Нестеренко Италийыште шоҥгыеҥ-влакым ончен, а Марий Элыште илымыж годым школышто йоча-влакым туныктен. Чолга марий ӱдырамаш тӱрлӧ семын еҥ-влаклан полша. Тидын нерген тудо тыглай шомак дене гына огыл, почеламут да шонкалымашан ойлымаш денат каласкален мошта. Ты арнян тыгай притчым возен колтен. Лудын ончыза.
Кугу чодыра йӱлаш тӱҥалын. Осал мардеж шыдын пуалын, тулойыпым утларак да утларак гына шара. Пеш шучко. Чодыра покшелне верланыше изи мотор ерыште илыше кол-влак ынде мом ыштат? Янлык ден кайык-влак шке илышыштым утараш да шучко деч утлаш манын, чодыра гыч лектыт. Эн ончылно – чодыра маска. Тудо изи кисам вашлиешат, ойла: «Киса, чылан куржыт. А тыйже молан мӧҥгеш чодырашке чоҥештет?» «Чодырасе ерышке вӱдлан каем. Тулым йӧрташ кӱлеш», – шокта вашмут. «Мо? Тый, изи киса нерет дене кунар вӱдым налын кертат?» «Мый кунар ыштен кертшашем ыштем», – манешат, киса чодыра ер деке чоҥешта…
Мыят изи киса семын калыкемлан уверым пуымем дене полшен кертам, тудат пайда, шонем. А тыгай неле жапыште кажне еҥ изи киса гае лийшаш улына, кажныже шке полышыжым шуялтышаш.