Исправительный пашам кӧ ыштышаш?

Уголовно мут кучаш шогалтыме годым исправительный пашам шукташ суд пунчалеш. Исправительный пашам кузе умылаш, кӧ тудым шуктышаш?

Светлана.

Кужэҥер район.

Волжскысо межрайонный прокуратур умылтара:

Исправительный пашам тӱҥ паша веран, тыгак паша деч посна шинчыше судитлыме еҥлан шукташ пуат. Паша веран судитлыме еҥ исправительный пашам шке паша верыштыже шуктышаш. Паша верже уке гын, уголовно-исполнительный инспекций дене каҥашен, верысе самоуправлений орган-влак тудлан ыштышаш пашам муын пуат. Тиде вер судитлыме еҥын илыме верже деч тораште лийшаш огыл.

Исправительный паша кок тылзе гыч кок ий марте шуйнен кертеш. Тыгай пашам шуктышо судитлыме еҥын пашадарже гыч кугыжаныш икмыняр процентым кучен кода. Кучен кодымо процент кугытым суд пунчалеш (5-20 процент).

Судитлыме еҥ исправительный паша деч шылын коштеш гын, суд тыгай еҥым пашам виеш ыштыкта але эрык деч посна коден кертеш (кум кече исправительный паша олмеш ик кече пашам виеш ыштыктат але ик кечылан эрык деч посна кодат).

Исправительный пашам шукташ огыт пу: икымше группо инвалидностян еҥлан, мӱшкыран ӱдырамашлан, кум ий деч изирак икшыван авалан, призыв але контракт почеш службым эртыше рядовой да сержант составыш пурышо воинский должностян военнослужащий-влаклан (судын пунчалым лукмыжо жаплан закон почеш палемдыме призыв почеш службым служитлен пытарен огыл гын).