Кодшо арняште Мер полыш штабыште видеоконференций йӧн дене «Единый Россий» партийын Генеральный Советшын секретарьже Владимир Якушевын вуйлатымыж да Россий Просвещений министр Сергей Кравцовын участвоватлымыж дене совещаний лийын.
Заседанийыш Марий Элым Вуйлатыше Юрий Зайцев ушнен. Тушто школым, йочасадым да кыдалаш профессиональный тӧнежлам чоҥымо да капитально олмыктымо нерген каҥашеныт.
Модернизаций программе почеш тений Шернур, Кужэҥер, Марий Турек, Курыкмарий да Медведево районлаште, Йошкар-Ола ден Волжск олалаште индеш школын 10 зданийжым олмыктат. Тидлан 1 млрд утла теҥгем ойырымо, тышеч 999 млн теҥгеже – федеральный бюджет гыч.
Контракт почеш школ ден йочасадлам 1 август марте капитально ачален шуктышаш улыт. Йочасадлаште ты пашам «Еш» нацпроектын «Ешлан полыш» («Поддержка семьи») федеральный проектше почеш шуктат: Марий Турек район Косолапысе «Ромашка» ден Волжскысо «Орлёнок» йочасадлам ачалат. Тидлан 128 млн утла теҥгем ойырат.
«Молодёжь и дети» нацпроектын «Профессионалитет» региональный проектше почеш колледжласе тунемме корпус ден тӱшкагудылам ачалат. 2025 ийыште ты пашалан тӱрлӧ бюджет гыч 310 млн наре теҥгем ойырымо.
Тиде нацпроект почешак 2025-2027 ийлаште Йошкар-Оласе 9А микрорайонышто школым чоҥаш палемдыме. Тудым 2027 ийыште шуктышаш улыт. Кызыт подрядчик верым ямдылен, вашке свайым кырыме сомылым тӱҥалеш.
Эльвира Терентьева.