Юлия Кузнецован «Первая работа» книгаже подростко-шамычым вес еҥым умылаш туныкта. Автор шке произведенийлаштыже тӱрлӧ ситуацийым йочан да кугыеҥын шинчашт дене ончалаш темла. Ты произведений подростко-шамычлан келыштаралтше «Папмамбук» сайтын иктешлымыж почеш, 2016 ийыште ик эн чапле книга семын палемдалтын.
Тушто кугурак класслаште тунемше Маша Молочникован эн кугу шонымашыже нерген ойлалтеш. Подростко кум арня теҥыз воктене канаш да йӧратыме испан йылмым тунеммылан веле жапым ойыраш шонымаш дене илен. Тидлан шагал огыл шийвундо кӱлын. Ача-аван шонымашышт почеш, ты окса дене пачерыште окнам вашталташ але вес пайдале сомылым шукташ лиеш. Садлан нуно ӱдырыштлан, шонымашыжым илышыш шыҥдараш манын, шканже шке оксам ыштен налаш темленыт.
Тидлан палыме ӱдырамашын куд ияш Дана ӱдырышт келшен толын. Тудо мутым колыштдымырак кушкын. Ӱдыр аваж дене чӱчкыдын Испанийыш чоҥештылын, садлан йылмым палашыже кӱлын. Тыге 15 ияш Маша Данан туныктышыжо лиеш. Изи ӱдырын кумылжым да койышыжым эскерен, самырык туныктышо кугыеҥ-влак молан йоча-шамыч ӱмбаке кычкырлат, а туныктышо-влак шукыж годым шыде улыт, манын умылен.