Морко райпо (районысо потребительский обществе) – Морко кундемыште веле огыл, республикыштат ик эн кумдан чапланыше организаций. Тудо 1918 ийыште почылтын да таче мартеат калык верч тыршен пашам ышта. Тӱҥ шотышто райпо рӱдӧ посёлкышто да район мучко тӱрлӧ кевыт ден кочмывер-влакым куча. Тылеч посна тудын пелен икмыняр предприятий уло, кажныже «ООО» (общество с ограниченной ответственностью) семын ышта. Тыгак Морко посёлкышто бытовой услугым шуктышто пӧрт (Дом быта) уло. Тудат райпо пелен шотлалтеш. Чумыр кооперацийыште таче кечылан чылажге 400 наре еҥ пашам ышта. Райпон тачысе илышыж нерген тысе правленийын председательже Нурфия Зульфаисовна Иванова дене мутланышна.
– Кугешнен каласен кертам, таче кечылан Марпотребсоюзын системыштыже ме икымше верыште шогена. Илыш деч вараш огына код, у оборудований-влакым наледена. Теве шукерте огыл киндым пӱчкедыше аппаратым налме, кӧрган когыльым ыштыше цехым почмо. Пытартыш ийлаште супермаркет сынан кевыт-влакым почедыме. Пашаеҥна-влак моткоч мастар улыт, ешышкына самырык-влакат уло кумылын ушнат.
Кинде комбинатна уло. Тыште хлебо-булочный да кондитерский кочкышым ыштат. «Заготовитель» ООО напиткым ямдыла. «Нива» ялозанлык предприятийыште мӱкшотар пашам ышта, а теле пагытыште тыште колым шинчалтат. Продукцийнам район деч ӧрдыжкат колтена: Татарстан кундемыш, Йошкар-Олаш. Республикысе моло райпо-влак дене сай кылым кучена. Мутлан, Шернур, Советский, Марий Турек коопераций-влак деч сатум налына. А нуно – мемнан деч. Тыгак Морко районысо фермер-влак да калык деч пакчасаскам, поҥгым, емыжым наледена, – каласкалыш Нурфия Зульфаисовна.
Каласыман, Морко райпо пелен улшо предприятий-влак кочкышыш ешартыш вещества-влакым огыт опто. Кочкыш мӧҥгысӧ гаяк, садлан тыгай сату кок-кум арня деч шуко огеш аралалт. Ты шотышто правлений председатель тыгерак мане:
– Мыланна калыкын тазалыкше шергырак, садлан чояланымаш уке. Калыкат сатунам качествыжлан кӧра йӧрата. Теве, лимонадна нерген чӱчкыдын «йоча пагытын тамже» маныт. Молан манаш гын ме сакырым алмаштыше веществам огына опто, чыла ончычсо технологий денак ыштена. Калык кинде кочкышымат, когыльымат уло кумылын наледа.
Нурфия Зульфаисовна Морко райпон тачысе илышыж нерген ятыр каласкалыш, нелылык-влак улмо шотыштат чоным почо. Туге гынат, тыште тыршыше пашаеҥ-влак сай кумыл да поро шонымаш дене ончыко ончат, пашаштым йӧратат. Райпо пелен профсоюз организаций уло. Тудо тӱрлӧ мероприятийым, вашлиймаш-влакым эртара. Кажне ийын райпон паша ветеранже-влак пайремыш погынат. Кызытсе пашаеҥ-влак спартакиадылаш, таҥасымашлаш коштыт. Икманаш, тыште илыш шолеш, паша ворана. Морко райполан ончыкыжымат тӱзланаш, калыкым куандараш, районым да республикым чапландараш тыланена.
Фото: Ургымо цехыште кеҥеж гоч йоча-влаклан школыш коштмо формым ургат. «Ты вургемым чийыше ӱдыр-рвезе-влак ушан-шотан, таза лийышт», – ойлат ургызо-влак.
Алёна Яковлева.
Авторын фотожо.