Икымше тренерже – ачаже      

    Пӧръеҥ-влак коклаште скиатлонышто кок призовой вер – мемнан: Александр Большуновын икымше да Денис Спицовын кокымшо!

Александр – Российысе национальный гвардий войскан военнослужащийже, Уарльский окргусо управленийын спорт командын инструкторжо, лейтенант. А Денис – ефрейтор званиян ечызе.

25 ияш спортсмен Александр Большунов Брянск областьысе Севский район Подывотье селаште шочын-кушкын. Эн ончыч тудым ачаже Александр Иванович Большунов тренироватлен. Сашан кугурак акажымат, Настям, ача эн ончыч ечыш шогалтен улмаш, но ӱдыр вес корным ойырен. Александрлан ече дене куржталышташ келшен шинчын: эн ончыч школын, вара районын чапшым арален. 2011 ийыште Александр Иванович эргыжым Брянск олаште ече дене куржталмаш дене спортшколыш Российын сулло тренерже Н.И.Нехитров деке колтен. Тыгодым шкежат тренировкым эртарымым чарнен огыл. Российыште икымше сеҥымашым Александр идалык гычак ончыктен: 2013 ий 6 февральыште 10 меҥгым классике стиль дене таҥасымаште икымше верым налын. Теният тудо 6 февральыште Олимпийский модмаште икымше гана сеҥен. 2014 ийыште 20 км дистанцийысе скиатлонышто сеҥен. А тудын результатше почеш Александрлан Российын спорт мастерже лӱмым пуэныт. Кум ий гыч сборныйышто самырык-влак коклаште (23 ияш марте) выступатлен. Спринтыште тудо ший призёр лийын, а 15 километрыш эрыкан стиль дене куржмаште сеҥен.

Пекинысе Олимпиадыште А.Большунов 15 км классический стиль дене куржмаште ший призёр лийын. Тидыже кудымшо олимпийский награде лийын. Пхенчан гыч кум ший да ик той медальла дене пӧртылын ыле.