31 октябрьыште Йошкар-Оласе Самырык театрыште «Ӱдырсий» конкурс эртаралтын. Республикын тӱрлö районлаж гыч толшо 9 ӱдыр шке мастарлыкым, кугезына деч куснышо марий йӱлам палымым ончыктеныт. Нунын кокла гыч иктыже – Звенигово район Ӱлыл Памъял ялын ӱдыржö Татьяна Батаева.
Тудо шуко шочшан ешыште шочын-кушкын. Ача-аваже вич шочшан улмышт годым йочапöртла гыч эше куд икшывым ончаш налыныт. Ик ешыште кушшо ӱдыр-рвезе-влак шочмо шольо-шӱжар, иза-ака гаяк лийын шуыныт, икте-весылан ваш полшен, пагален илат.
Таня – ача-аважын кокымшо икшывышт. Эн кугурак Аделина ӱдырышт марий эстрадыште шукылан палыме. Танян тыгак Эвелина, Магдалина шӱжарже-влак, Герман шольыжо улыт.
Таня йочаж годсек мурен-куштен моштен, но сӱретлаш поснак йöратен. Аваже Елена Варсонофьевна ӱдыржын сӱретлен моштымыжым ужын да тудым Йошкар-Оласе президент школышко тунемаш пуэн.
«Сӱретлаш авам шӱмаҥден. Изиэм годым тудо чиялташ келыштарыме книга-влакым наледа ыле. Мый чиялтен шинчылтын омыл, мöҥгешла, тудым ончен, шке сӱретленам.
1-4-ше классла марте Ӱлыл Памъял школышто, вара талантан йоча-влаклан президент школышто тунемынам. Тушто 8-ше классыште тунеммем годым «Дом моей мечты» конкурсышто 2-шо верым налынам ыле. Урок деч вара рисованийым туныктышо Юрий Михайлович Морозов деке коштынам. Тудын сӱретлаш, карандашым чын кучаш туныктымыжым шарнем. Школ деч вара художественный училищышке тунемаш пуренам. Тушто 2018 ийыште «дизайнер-преподаватель» специальностьым налынам. Кызыт Кужмара селасе йоча сымыктыш школышто йоча-влакым сӱретлаш туныктем. Йоча-влак дене пашам ышташ неле огыл, но чытыш кӱлеш. Нунын дене пырля шкеат шукылан тунемам», – ойла туныктышо.
Татьяна портретым, пейзажым сӱретла. Мотор игече годым пӱртӱс лоҥгашке сӱретлаш лектеш. Пашаже-влакым гуашь чия дене сылнештара. Тачысе кечылан 100 утла сӱретше уло.
«Ӱдырсий» конкурсышто самырык туныктышо икымше гана участвоватлен.
«Ӱлыл Памъял клубым вуйлатыше Светлана Геннадьевна Иногородцева конкурсышто вийым тергаш темлен. Тидын шотышто ик жап шонышым, лӱдмашын чучо, молан манаш гын кугу сценышке але марте лектын омыл ыле. Вара тудын ойжо дене келшышым. Конкурсышто шкем нерген войзымо видео почеш палдаренам. Марий сӱаныште ӱдырын марлан кайыме йӱла сценкым ончыктенам. Тидлан клуб пеленысе «Памъял ӱдыр-влак» ансамбльын участницыже-влак полшеныт. Вара, костюм-влакым чиен, дефилем ончыктенам», – ойла участнице.
21 ияш ӱдырлан тиде конкурс чолгарак лияш куатым ешарен. Вет ӱдыр мура-кушта, сӱретлен мошта веле огыл, тыгак пашамат ышташ тале. Ача-аважын суртыштышт куд ушкал, кандаш презе, сöсна улыт. Кайыквусат ятыр. Пакчасаскам шуко шындат. Сандене самырык ӱдыр ача-аважлан эре полышкален шога. Поро, тыматле ӱдыр жапым кеч-кунамат пайдалын эртара.