Икте чай шудым пога, весе вургемым урга…

Иктаж оҥай хоббида уло мо? Тудым оксам кондышо пашаш савыраш лиеш мо?

Мария Капустина,

Йошкар-Ола:

Гофрироватлыме кагаз дене тӱрлӧ пӧлекым вич ий наре ыштылам. Тиде кидпаша скрапбукинг маналтеш.

Икмыняр дембель альбомым йодмо почеш ыштенам. Тылеч посна пеледыш аршашым, шоколадым опташ атым, открыткым ямдыленам.

Чон-кумыл пашам ешартыш оксам конда гын, тиде – кок пачаш куан.

Татьяна Тойшева,

Шернур район:

Пеледышым ончаш йӧ-ратем. Тудо чоным куандара, оралтым сӧрастара. Чылаже 40 наре тӱрлӧ пеледышым куштем.

Южгунам пеледыш росотам ужалем. Тыгак фоамиран дене ӱплан резинкым, заколкым, ободокым ыштылам.

Екатерина Иконникова,

Йошкар-Ола:

Шукерте огыл трикотаж дене вургемым ургаш тӱҥалынам. Ондак ешем, палымем-влаклан гына ургенам, кызыт заказ почешат ургем.

Садлан лӱдде каласен кертам: йӧратыме пашам оксам конда.

Анастасия Апакаева,

Морко район:

Тӱрлӧ шудо дене чайым ямдылем. Утларакшым чодыраште кушшо эм шудо-влакым погем, коштем. Икмыняр кушкылым иктыш ушем,

пакчаште кушшо шудо, емыж, саска-влакымат ешарем. Тыге кажне гана тӱрлӧ таман, виян чай лектеш. Йӧратыме сомылем вес еҥ-влаклан пайдам конда, тыгак шийвундымат ешара.

Ирина Алексеева,

Йошкар-Ола:

Номер почеш чиялтыме картине-влакым кевытыште налам да чиялтем. Тыгак алмазный манме мозаике дене заниматлем.

Тидыже куштылго паша огыл, но мылам келша. Куд тыгай картинем уло. Шукерте огыл авамын лӱмгечыжлан мотор пион-влакым сӱретлен, Урал кундемыш колтышым.