Светлана Осининан лывырге кидыштыже крючок, спице модыт гына. Кужэҥер район Нурсола ялеш шочын-кушшо, кызыт Медведево посёлкышто илыше кидмастар Светлана Николаевна сӧрал курчакым, тӱрлӧ янлыкым, мотор вургемым ынде куд ий пидеш.
Ӱдырын коваже, аваже, тале кидмастар улыт, сайын пидын моштат. Ты мастарлык ешыште кушшо кок ӱдыр кокла гыч Светланалан куснен. Куд ияшак спице дене пидаш тӱҥалын.
– Мый шолагай улам. Авамлан мыйым кидпашалан туныкташ неле лийын. Сандене ковам пидаш туныктен. Йочасадышке коштмо годымак курчак-влаклан тӱрлӧ вургемым пидынам. Кужэҥер посёлкысо школышто 8-ше классыште тунемме годым кидпашам ыштыме кружокышко коштынам. Тунам спице дене курчакым, тигрым, чывым, коля игым пидынам ыле. Варажым модыш-влакем Кужэҥер посёлкысо тоштерышке пуэнам. Экзамен-влаклан ямдылалташ кӱлын. Сандене 9-ше класс деч вара ты пашам ыштымым чарненам, – мане С.Осинина.
10-шо класс деч вара ӱдырын ешыже Медведево посёлкышко илаш куснен. Сандене Светлана 11-ше классым Медведево посёлкысо 1-ше №-ан школышто тунем пытарен.
Пинеткым, калпакым пидеш
Светлана изиж годсек пӱртӱслан мелын кушкын, чодырам йӧратен. Тидлан кӧра тудо Йошкар-Оласе Политехник колледжыште чодыра паша дене кылдалтше технологлан тунемын, варажым Волгатехыште инженер-технологлан шинчымашым заочно налын
Ик жап шке профессийже дене Йошкар-Оласе ик частный организацийыште тыршен. Витамин заводышто, пытартыш жапыште Марий машиностроительный заводышто ыштен. Вара икмыняр жап Москошто ешге иленыт. Лач тунам тудо кидпашам ышташ тӱҥалын.
– Жап шуко. Йокрок лийын. Интернетыште ончыштын, спице дене вургемым пидаш кумылаҥынам. Эн ончыч шканем, шӱжаремлан кофтым ыштен ончышым. Сайын веле лекте. Ужалаш пидаш тӱҥальым. Вара кофтым, тувырым, тапычкым, йоча-шамычлан комбинезоным, пинеткым, калпакым пидынам. Ик жап роза пеледыш-влакымат пидынам. Чыла пашам Интернетышке лукташ тӱҥальым. Налаш йодшо-влак ятырын лийыч. Кызытат йодмо почеш пидам», – мане Светлана.
Мотор курчак, янлык-влак…
Варажым тудо модыш-влакым ышташ тӱҥалын. Таче тудо могай гына янлыкым огеш пид!
– Мыланем курчакым, модышым эн чот пидаш келша. Ты паша оҥай, тыгодым вашке пидалтеш. Тидлан крючокым кучылтам. Южо схемым Интернетыште оксала налам. Пытартыш жапыште тигрым, мераҥым, пийым, пырысым ямдыленам.
Турлӧ кугытан курчакым ыштем. Кажне капкыл ужашыжым посна пидам да икте-весыштым пырля ушен ургем. Кӧргышкыжӧ холлофайберым шӱшкам. Курчак сайын шогыжо, кидше-йолжо тарванылже манын, алюминий воштыр дене кучыктем. Ӱпым ямдым налам але шӱртӧ дене шке ыштем. Шинчажым я тӱрлем я налмым пижыктен шындем. Чыла ыштен пытарымеке, тудлан вургемым крючок дене пидам. Вургеман курчакым ик арняште ыштен шуктем,– мане Светлана.
Кидмастар тыгак пледым пидеш. Пытартыш жапыште тудо мотор лумпырче-влакым ышташ тӱҥалын.
– Шӱртӧ шуко кӱлеш. Сандене утларакшым материалым Интернет гоч заказатлем. Тыге шулдынрак лектеш. Шинча ярна гынат, мылам ты пашам ышташ келша, тыге чон кана. Илен-толын, иктаж гана шӱртым, шкемын пидме вургем ден модыш-влакым ужалыме кевытым почаш шонем. Но палем, тидым илышыш пурташ йӧсӧ лиеш. Туге гынат сайлан ӱшанем, – иктешлыш Светлана Осинина.
Вате-марийын Данил ден Кирилл эргышт-влак кушкыт. Кызыт ава Кирилл эргыже дене мӧҥгыштӧ шогылтеш.