Марий кундемыштына СВО-што улшо салтак-влаклан тӱрлӧ семын полшат. Кужэҥер районысо Коҥганур кыдалаш школат ты кӱлешан пашаш ушнен. Тидын нерген директорын воспитатлыме паша шотышто директорын алмаштышыже Эльвира Андреевна Рыбакова дене мутланенна.
Носким пидыт
– Туныктышо коллектив дене погынен, СВО-што улшо салтак-влаклан могай полышым пуэн кертына манын шонкаленна. Окопысо сортам ышташ парафин шуко кӱлеш, сеткым пидаш жапна уке, сандене шокшо носким погаш тӱҥалынна. Кок арня ончыч ты акций нерген школышто увертаренна да лӱмын коробкам шынденна. Ондак коробка икмыняр кече яра шинчен, вара ик кумылан еҥ икымше мужыр носким пыштен да эркын дене молат ушненыт. Ик коробка вашке темын – кокымшым шынденна, вара – кумшым. Кӧ шке гыч пидме носким конден, кӧ кевытыште налын. Тыгак 4-11-ше класслаште тунемше-влак кумылаҥдыше серышым возеныт.
Тӱҥжӧ – ача-ава-влакын да йоча-шамычын полшымышт дене элнам аралыше-влаклан пайдам кондена, – палдара Э.Рыбакова.
Тиде полыш салтак-влаклан Кужэҥер посёлкысо «Единство» поро кумылым ончыктымо фонд гоч миен шуэш.
Палемден кодыман, серышым возымашке йочасадыш коштшо-влакат ушненыт. Тидын нерген воспитатель Эльвира Быкова тыгерак каласкалыш:
– Школышто тыгай акций эртымым пален налмеке, меат йоча-шамычым ушнаш кумылаҥденна. Нуно возен огыт мошто, сандене ача-ава-влаклан серышым серыктеныт, а кагаз шеҥгелан ӱдыр-рвезе-шамыч сӱретым сӱретленыт, шке кидкопаштымат коденыт. Салтак-влакым шушаш У ий пайрем дене саламленыт, тазалыкым тыланеныт да мӧҥгышт нуным вучат, пагалат манын возеныт. Тылеч посна икмыняр икшыве ача-аваштым носким налын пышташ йодыныт.
Модышым колтеныт
– Декабрь тӱҥалтыште «Новогодний сюрприз другу» республикысе акцийыш ушненна ыле. Тушто тунемше-влак тӱрлӧ материал гыч кожыш сакыме модышым ыштеныт. Кок коробка модыш погынен. Нуно Запорожский областьыш, Донецк, Луганск республиклаш миен шуыныт, – Эльвира Андреевна.
Республикнан тӱрлӧ верыштыже таче тыгай полышым пуат, сайлан ӱшанен илат. Кажне еҥ, ты поро пашаш ушнен, салтак-влаклан пайдам конден кертеш. Тидлан кумыл гына лийже!
Коҥганур школын ВК-се тӱшкаж гыч налме фото-влак.