4 да 5 июньышто Марий Элыште чодыра аланыште пашам ыштыше-влак коклаште профессиональный мастарлык шотышто республикысе конкурс эртаралтын. «Чодырам эн сайын йӧрыктышӧ» номинацийыште Звенигово район Изи Кожвож ялыште илыше, Йошкар-Оласе Марий чодыра озанлык техникумын икымше курсын студентше Илья Назаров участвоватлен.
– Илья, ончыкылык профессийлан молан чодыра озанлык специалист лияш ойыренат?
– Ачам Игорь Николаевич пум мастарын руэн мошта. Тудак мыйым шукылан туныктен. Пӱртӱсыштӧ лияш йӧратем. Чодыраште улмем годым чонемлан ласка. Тидат ончыкылык профессийым ойырымаште амал лийын.
– Пушеҥгым йӧрыктымаш ик эн лӱдыкшӧ пашалан шотлалтеш. Тидын шотышто мом ойлен кертат?
– Пушеҥгым йӧрыкташ неле веле огыл, тыгак моткоч лӱдыкшӧ. Пила дене пашам ыштыме годым тӱткӧ лийман. Пушеҥге вуй гыч укш катлен кертеш. Шке ошкылетым, йырым-йырысе кумдыкым, икманаш, чыла лӱдыкшым шотыш налман. Тиде пашаште йоҥылышым ышташ ок лий. Уке гын, эмганен кертат. Сандене пушеҥгым йӧрыктышӧ мастаръеҥ физически виян, чытыше лийшаш, стресс ситуаций гыч вашке лекташ йӧным муын моштышаш. Спорт дене кылым кучыман. Мый куштылго атлетике дене заниматлем.
– Илья, тый «Профессионалы» мастарлык шотышто чемпионатын участникше лийынат. Кузерак вара тушто шкендым ончыктенат?
– Мастарлыкем эре шуараш тыршем. Конкурс-влак тидын шотышто чот полшат. Коллегем-влакын пашаштым ончен, шкежат шукылан тунемам. «Профессионалы» чемпионатын Марий Элысе веле огыл, Российысе да тӱнямбалысе этаплаштыжат участвоватленам. Регионышто пушеҥгым йӧрыктымаште икымше лийынам гын, Россий да тӱнямбал кӱкшытыштӧ кугу сеҥымаш дене моктанен ом керт. 16 ияш веле улам, сандене эше чыла ончылно.
– Пум чылан ик семын пӱчкедеда, але кажне мастаръеҥын посна шке ойыртемже уло?
– Пӱчкедыме йӧн тӱрлӧ. Конкурслаште тидым сайын ужаш лиеш. Мутлан, иканаште пӱчмаш. Тыгай йӧн годым йырым йыр кумда вер уло гын, пушеҥгым вож марте пӱчкыт. Тыгак ужаш дене пӱчкедыме да оттяжкым кучылтмо йӧн-влак улыт.
– Пушеҥгым йӧрыкташ огыда чамане?
– Эн ончыч жал ыле. Но пушеҥгым амал деч посна огына пӱчкеде. Чодырам эрыкташ кӱлеш. Пушеҥге-влак пеш чӱчкыдын шогат гын, вашла кушкашышт мешаят. Адакшым ик пушеҥгым руэна гын, олмешыже весым шындена.
– Пушеҥгым йӧрыктышӧ-влакын иктаж-могай калык палышт уло мо? Тидлан ӱшанеда?
– Кӱдырчан йӱр деч ончыч чодыра тыплана манын ойлат. Тыгак иман пушеҥгын укшыжо волен каен гын, игече пылан лиеш. Мардежан годым пушеҥгым йӧрыкташ огына тырше. Сандене шуко чодыра пашаеҥ игечым эскеренак шога. Йошкар ӱжара – виян мардежлан, маныт. Мый гын тыгай палылан ом ӱшане.
Илья Марий ялозанлык техникумын командыж дене пырля тӱрлӧ сынан мероприятийыште чӱчкыдын участвоватла. Мутлан, кодшо арнян «Авангард» патриотический воспитаний рӱдер пелен эртаралтше «Зарница 2.0» модышын регионысо этапыштыже лийын. Чолга студент военно-патриотический аланыште шинчымашыжым да моштымашыжым ончыктен.
И.Назаровын альбомжо гыч налме фото.