Идалыкын ӱдыржӧ – Алёна

 

Тений «Ӱдырсий» марий конкурс онлайн формат дене эртыш.
Усталык таҥасымашке республикысе районла да марий-влакын тӱшкан илыме кундемла гыч 13 самырык ӱдыр ушнен. Гран-прим Озаҥысе «Лай мардеж» ансамбльын участницыже, Рушарня школын марий пӧлкажым туныктышо Алёна Токташова сеҥен налын.

 

Алёна шкеж нерген Татьяна Ибатиеван почеламутшо дене ойлаш тӱҥале:

«Кузе ом лий марий чонан?

Марий ешеш мый шочынам!

Марий ачам, марий авам –

Кузе мый руш лийын кертам?»

А.Токташова Морко район Усурт Вараҥыж ялеш социальный пашаеҥ ден лесникын ешыштышт шочын. Тысе тӱҥалтыш школыш коштын, варажым Шеҥше школышко пасу гоч куржталын. Тунемын сайын, школышто чолга лийын.

11-ше класс деч вара МарГУ-н физико-математический факультетыштыже туныктышылан да Марий аграрный колледжыште (тудо Медведево район Ежовышто верланен да ты вузын филиалжылан шотлалтеш) экономист-бухгалтерлан тунемын.