18 декабрьыште Ижевскыште Калык-влакын келшымаш пӧртыштышт «Интернациональная семья. Ижевск-2022» конкурсышто куд еш участвоватлен.
Нуно ешышт дене палдареныт, национальный вургемым чиен лектын, усталык номерым ончыктеныт. Тыгак тукымышт нерген каласкалыше посна лукым сӧрастареныт, ешысе национальный кочкышым сийлаш конденыт, тудын презентацийжым эртареныт.
Келшен илыше ешлан Алнаш район Маскиялыште илыше Япаровмытым (Нина Юрьевна удмурт, а Иван Иванович марий) шотленыт. Нуным «Моя семья – моё богатство» номинацийыште акленыт да Гран-прим кучыктеныт. Моло участникымат тӱрлӧ номинацийыште палемдыме.
