Совет Ушем Герой А.Н.Громовын шочмыжлан тений 110 ий темын. Тиде дате лӱмеш икмыняр мероприятийым эртарыме.
24 сентябрьыште Советский посёлкысо А.С.Крупняков лӱмеш рӱдӧ книгагудышто «Герой Днепра» шарнымаш кас лийын. Тушко посёлкысо 3-шо №-ан школын 10-шо классыште тунемшыже-влак, геройын ӱдыржӧ-влак да шочмо Кукмарий ялже гыч уна-влак миеныт.
25 сентябрьыште .У Торъял посёлкышто лӱмгечыжлан пӧлеклалтше мероприятий обелиск ончылно эртаралтын. У Торъял школын тунемшыже-влак 1-ше №-ан постышто шогеныт. Родо-тукымжо ден погынышо-влак геройым шарналтеныт (фотом Интернет гыч налме).
Советский район Кукмарий ялыште (ончыч тудо У Торъял районыш пурен) мероприятий-влак 27 сентябрьыште лийыныт. Школышто тунемше-влаклан квест эртаралтын. Вара нуно тӱвыра пӧрт да геройын шочмо пӧртшӧ воктеке погынен каеныт, чап оҥа воктек пеледышым пыштеныт. Умбакыже мероприятий тӱвыра пӧртыштӧ шуйнен. Тушто А.Н.Громовын кугезе уныкаже Дарья Медведева (8-ше класс) кочаж нерген шымлымаш пашаж дене палдарен.
Шочмо кечыж шотышто. 2020 ий 24 сентябрьыште Советский район Кукмарий тӱвыра пӧрт пырдыжеш Совет Ушем Герой Алексей Николаевич Громовлан шарнымаш оҥам почмо. Ты кундемыш тений лачак 24 сентябрьыште логальым. Википедийыште шочмо кечыжым 15 август манын палемдыме. А ӱдыржӧ-влак герой шке шочмо кечыжым эре 25 сентябрьыште палемден, маныт. Архивыште пургедме годым архив пашаеҥ-влак метрика книгаштыже 31 августышто шочын манын возымым муын луктыныт.