Пошкырт кундемын талантан эргыже Мирослав Арсланов дене тений Марий самырык тукым слётышто палыме лийынам. Тунам слётын участникше-влак спорт мероприятийлан ямдылалтыныт. А Мирослав тидын годым, пӱкеныште шинчен, гармонь сем почеш «Канде каваште» мурым йоҥгалтарен. Семӱзгарым устан шокта, йӱкшат виян.
Марий сем йоча чоным авалтен
Мирослав Калтаса район Амчемучаш ялыште куд шочшан ешыште кушкын. Тудын акаже, изаже, шольыжо да кок шӱжарже улыт. Каче гармонь семеш, марий муреш кушкын, манаш лиеш. Тудын ачаже Иван Ислангулович чӱчкыдын гармоньым шоктен, а аваже Ирина Александровна марла мураш да тавалташ йӧратен. Кызыт шуэнрак тидым ыштат. Адакшым аважын могырым чӱчӱжӧ-влак гармоньым, баяным, тальянкым устан шоктен моштышо улыт.
– 11 ияшем годым, ачамын гармоньым шоктымыжым ончен, шкемынат тиде семӱзгар дене лишкырак палыме лияш кумыл лектын. Ачай мылам кок семым кузе шокташ ончыктен. Тыге шкежат гармоньым шокташ тӱҥалынам. Гармонь сем чонемым лыпландара. Весела, ойган семымат шокталтем, кумыл почеш, – ойла Мирослав.
М.Арсланов ял клуб пеленысе «Ош пеледыш» ансамбльыш коштын. Клубыштат гармоньымак шоктымыжо шуын. Мирослав шкаланже гармоньым 2014 ийыште налын. Тунам тудо 9-ше класс деч вара Нефтекамскышсе шуко профилян колледжыш электромонтажниклан тунемаш пурен улмаш.
– Кристина акам дене еҥ деч «Чайка» гармоньым налынна. Семӱзгарын «йылмыже» чӱчкыдын пужла ыле, сандене эреак ачален шогаш логалын, – шарналтыш уста еҥ.
Сымыктыш тӱня лишыл
Илышыште пашазе профессий кӱлешанрак шонымаш дене Мирослав электромонтажниклан тунем лектын. Ик жап Москошкат пашаш коштын. Но чонжо эре сымыктыш тӱняш ӱжын. Тидыжым аважат ужын да эргыжлан Йошкар-Оласе И.С.Палантай лӱмеш тӱвыра да сымыктыш колледжыш тунемаш пураш темлен. Ирина Александровна шке жапыштыже тушто хоровой дирижирований пӧлкан студенткыже лийын. Но тӱрлӧ амаллан кӧра тунеммашым кодашыже логалын.
– Авай 2018 ийыште айда Марий Элын рӱдолашкыже миен толына, тушто кодаш кумылет лектеш гын, тунемаш пурет, уке гын, нимат огыл манын ойлен. Тыгак ыштышна. Тӱвыра да сымыктыш колледжат, Йошкар-Олат чонемлан лишылла чучыныт. Да 2019 ийыште хоровой дирижирований пӧлкаш тунемаш пуренам. Шкемынат, авамын самырык годсо шонымашыжымат шуктенам, манын кертам.
Тунемме программе оҥай лийын. Мый гармоньым шоктымаште мастарлыкем нӧлтенам, тылеч посна фортепиано дене шокташ тунемынам. Икымше курсыштак «Жар-птица» мурышо ансамбльыш кошташ тӱҥалынам. А кокымшо курсышто «Эрвел марий» ансамбльыш ушненам. Ансамбль-влак дене тӱрлӧ олаште гастроль денат лийынна, конкурс ден фестивальыштат участвоватленна, – палдарыш Мирослав.
Мурызо
Мирослав уста гармонист веле огыл, тудо тыгак мураш йӧрата. Кызытеш репертуарже поянжак огыл, но чыла ончылно. Тенор йӱкан М.Арслановын икымше «Аваем, ачаем» мурыжо студент жапыштыже шочын. Марий Эл Радиошто тудым чӱчкыдын колташ йодыт.
– Урал марий Юрий Скаредин шомакшым возен да мылам, йӱкет келшыше манын, мурым пӧлеклен. Мый тунам тидлан моткоч куаненам. Семже палыдыме авторын, изиш йӱкемлан келыштарыме.
2020 ийынак «Улат пеленем» муро шочын. Мутшым Христина Александрова возен, семжым – Светлана Яндукова.
Ӱмаште «Калтаса кундемем» муро радиошто да интернетыште йоҥгаш тӱҥалын. Мурылан мутым Алевтина Баязитова возен, а семым Вячеслав Осипов келыштарен, – палдарыш мурызо.
Кызыт Мирослав у муро-влакым ямдыла. Иктыже – «Йӧратымаш» пашаже – шукерте огыл лектын. Тудлан мутым таҥже Дарья Юрьева возен, а семже – шкенжын. Вучена мурызо деч сылне деч сылне пашам.
Ик мурымаш-куштымаш дене гына илаш ситыше оксам чылаж годым ыштен налаш ок лий. Сандене М.Арсланов тӱрлӧ пашам ышта. А кеҥежым кастене йолташыже-влак дене пырля, оласе рӱдӧ паркыш чӱчкыдын лектын, гармонь сем почеш мурым муралта, муро фестивальлашкат жапше улмо семын эреак ушна.
Еш альбом гыч налме фото-влак.