Кугу Отечественный сарыште сеҥымылан 74 ий темме пайрем вашеш республикыштына гармонист-влак коклаште икымше гана Василий Тёркин лӱмеш кубок верч регион-влак кокласе турнир эртаралтын. Тудо Сеҥымаш кече деч кок тылзе ончычак, 3 мартыште, тӱҥалын да 5 майыште иктешлалтын. Финалыште Параньга ден Шернур районла гыч мийыше гармонист, мурышо, куштышо-влак шке мастарлыкыштым ончыктеныт гына огыл, а тале таҥасымашым шижын, пӱжвӱд йогымеш тыршен, шке командыштлан сеҥымашым кондаш тыршеныт. Конкурс Шернур поселкысо тӱвыра пӧртыштӧ эртаралтын.
Пайремым почаш да «Опаленная войной» лӱман икымше номинацийыште мастарлыкым ончыкташ уна-влаклан ӱшаненыт — Параньга район гыч толшо-влак гармонь сем почеш сар годсо мурым муралтеныт, почешышт – Шернур кундем. Икымше номерыштак кок командыге эн кугу баллым (15 гыч) налыныт.
«Дети салютуют Победе» лӱман кокымшо номинаций калыкым утларак кумылаҥден, сарын кочо косажым муро гоч шижаш йоча-влак полшеныт. Гармоньым вес семӱзгар дене пырля шоктымо номинацийыште тӱмыр, балалайке деч посна кок командыге кӱслемат, скрипкымат, молымат шоктен ӧрыктараш тыршеныт, но адакат икгай ак пуалтын. Виян таҥасымаш пытартыш шымше номинаций марте шуйнен. Калык совым рӱж кырен, Параньганат, Шернурынат командыштын икнаре баллым погымым ужын, жюриште улшо-влак сеҥышым кузе ойыраш ӧрыныт. Нунын увертарыме ешартыш кандашымше, индешымше номинаций деч варат эн вияным палемден кертме огыл – кок командыге иктӧр каен. Жюри трукышто шонен лукмо эн сылне концертым ончыкташ темлен. Тыштыже Параньга вел гыч толшо-влакым Шернур вел гармоньчо ден артист-влак ончылтеныт, нунак Василий Тёркин лӱмеш кубокын озаже лийыныт, а пӧлек шотеш гармоньым налыныт. Турнир мучко посна номинацийлаште сеҥыше команде-влаклан диплом да спонсор-влак деч шергакан пӧлек логалын.
Тыгай таҥасымашым Параньга районын шочшыжо, тале марий юрист Алексей Инородцев шонен муын, Шернур район администраций дене пырля эртараш кутырен келшеныт. Тыге сарыште кредалше-влакым шарналташ да нунылан тауштымо шот дене калыкнан кӧргӧ виян, мастарле улмыжым ончыкташ эше ик сай йӧным муыныт.
— Тар шикш пушан шучко пагытым ме монден огына керт. Кушкын толшо тукымат тидым палышаш. Йоча-влакым патриотизм шӱлышеш шуарена гын, элыштына ӱшанле салтак-влак лийыт. Мурылан, семӱзгарлан шӱмаҥдыме паша кӱлешан, — манеш А.Инородцев. — Японий да Корей гай виян эллаште йоча-влакым музыкальный школлаште эсогыл виеш туныктат, молан манаш гын, кок кидысе парнялам иканаште лывыртен да йоча моторикым вияҥдыме дене вуй вес семын пашам ышта, тыгай айдеме ойыртемалтше уш-акылан лиеш. Сем полшымо дене гына айдемын вуйдорыкышто кок полушарийым иктеш пашам ыштыкташ лиеш манын палемдат. А ме ужына, тачысе кечын илышышкына тӱрлӧ электрон технологий утларак да утларак шыҥа, тидлан кӧра йолагайыш каена, ялыште гармоньым шоктышо-влак шагалемыт да молат. Тыге ынже лий манын, конкурсым эртарыме. Вет ме палена: гармоньым шоктат гын, калыкат ила.
Василий Тёркин лӱмеш гармонист-влак конкурсын библиотекыже ышталтын, пойдаралташ тӱҥалын: Май пайрем вашеш А.Инородцевын чумырымо «Помним, гордимся. Шарнена, кугешнена» лӱман муро аршашыже лектын. Икымше книгаште сар годымсо муро-влакым ното дене пырля рушла да марла савыктыме.
— Конкурсым эртарыме дене кугу пашан тӱҥалтыш ошкылжым ыштенна. Калыклан тудо келшен, сандене умбакыжат эртараш тӱҥалына. Мый эн ончыч Шернур район администраций вуйлатыше Сергей Адигановлан, талантан участник-влаклан да поро кумылан спонсор-влаклан тауштем, — иктешлен каласыш Алексей Харитонович.
Василий Тёркинын кубокшо верч турнирыште чылаже 50 наре гармонист таҥасен, 140 наре еҥ сцене гоч шке мастарлыкшым ончыктен.
И.Речкинын фотожо-влак.
Моло приз дене палемдалтше-влакым тиде ссылке почеш рашемдаш лиеш
