Российысе экспорт рӱдер «Российыште ыштыме» тӱнямбал экспортный форумым эртара. Тудо «Международная кооперация и экспорт» нацпроект почеш илышыш шыҥдаралтеш. 20-22 октябрьыште Москосо «Манеж» музейно-выставочный ушемын площадкыштыже лиеш.
Форум элнан экспортшо шотышто ятыр йодышым лончылаш йӧным ышта. Эн ончыч тӱнямбал йыжыҥыште эртымыжым палемдыман. Тыште Россий Федерацийысе правительствын бизнес тӱшка-влак дене могай направленийыште пашам шуктымыштым пален налаш лиеш.
Программе почеш логистике, маркетинг, финанс, аналитике дене внешнеэкономический пашам шуктымо сомыл кузерак вораҥме нерген мутланаш шонат. Тушто бизнесмен, федеральный дене регионысо исполнительный властьысе орган-влакын вуйлатышышт, Российысе банк-влакын директорышт, экспортым поддерживатлыше регионысо рӱдер-влакын пашаеҥышт да молат лийыт. Тылеч посна мультимедийный выставочный залыште элнан сатуж дене палдарымаш лиеш. Тидыже регионысо ден федеральный промышленный сатум ыштыше предприятий-влакым тӱнямбал кӱкшытыштӧ палдараш йӧным ышта.