Теҥгече кастене «Авангард» рӱдерыште финн-угор йоча да самырык-влакын слётышт официально почылтын. Ты гана тудо 6 гыч 12 август марте пашам ышта да 33-шо гана эртаралтеш.
Тышке Марий Эл, Башкортостан, Карелий, Мордовий, Татарстан, Коми, Удмурт Республикла, Угарман, Виче областьла гыч 30 йоча толын.
Нуно 12 август марте лийыт да тӱрлӧ программыште участвоватлат. Ты гана слётышто Финно-угроведений университет пашам ышта. Тыгак организатор-влак финн-угор калык-влак дене кылдалтше занятий-влакым темлат. Нуным тыге лӱмдымӧ: «Финн-угор-шамыч, кӧ ме улына?», «Устный калык усталык», «Финн-угор калык модмаш да куштымаш», «Калык семӱзгар-влак». Нине уроклашке коштын, самырык-шамыч модмо формо йӧре зачётым сдатлат да университетыште тунемме нерген дипломым налыт.
Ты лагерьым тений Марий Элысе молодёжный политике комитет ден «Эр вий» СДПО (вуйлатышыже – Маргарита Михайловна Маланова) эртарат. Тыште 12-18 ияш йоча ден самырык-шамычым шке да родо-тукым калыкым утыр палаш да тидлан кумылаҥдат. Кажне делегацийын кечыжым, калык-влакын модышыштым эртарат, тӱрлӧ кидпашалан туныктат да ваш келшен илаш таратат. Чынжымак, ондак ты лагерьыш вес элла гычат икшыве-влак толыныт, а тысе мероприятий-влакым Кастрен ушем полшымо да тӱрлӧ грант кӱшеш эртареныт.
Эльвира Терентьева.
Марий Элысе молодёжный политике комитетын фотожо.