Октябрь тӱҥалтыште Белоруссийысе Бобруйск олаште йолын коштмо дистанций дене спортивный туризм дене Европын чемпионатше эртаралтын. Российын сборный командышкыже Марий Элысе «Виктория» олимпийский резерв спорт школын воспитанникше Георгий Дмитриев лийын. Тудо личный кужу дистанцийыште 2-шо лийын, кӱчык дистанцийыште – 3-шо. Тыгак иктешлымаш почеш тудлан эше 2-шо верым пуэныт.
Тушто Белоруссий, Молдавий да Россий гыч 30 утла спортсмен таҥасен. 18 ияш рвезе тыгай кугу таҥасымаште икымше гана лийын.
«Мый Йошкар-Олаште шочын-кушкынам. Кызыт Волгатехыште информатика и вычислительный технике факультетыште тунемам. 2012 ийыште йоча да самырык-влакын «Азимут» рӱдерышкышт кошташ тӱҥалынам. 2013 ийыште туштак спортивный туризм дене заниматлаш кумылаҥынам. Варажым Йошкар-Оласе «Виктория» олимпийский резерв спорт школышто шкем вияҥденам. Эн ончыч республикын туризм шотышто сборныйыштыжо лийынам, тений Российын сборныйышкыжо логалынам.
Европысо чемпионатыште участвоватлаш куштылго огыл. Виян, тале спортсмен-влак погыненыт. Туге гынат тушеч кок ший да ик бронзо медальым конденам. Российын сборныйжо ты чемпионатыште 1-ше верым налын», – пелештыш Г.Дмитриев.
Кызыт Георгий туризм дене кылдалтше Российысе вес таҥасымашке каяш ямдылалтеш. 20-25 октябрьыште Башкортостан республикыште студент-влак коклаште эртаралтше йолын коштмо спортивный туризм шотышто таҥасымаш лиеш. Марий Эл гыч тушко 17 студент кайышаш.