Таче кече гыч Марий Элыште зависитлыдыме мер эскерыше-влакым туныкташ тӱҥалыныт. Мероприятийым республикысе Мер эскерымаш штаб эртара.
Ныл кече жапыште ныл муниципалитетыште 140 наре эскерышым ямдылышаш улыт.
– Программым «Независимый общественный мониторинг» ассоциаций Российысе Мер палате дене пырля ямдылен, – каласен штаб вуйлатышын алмаштышыже Роман Золотухин.
Сайлыме законодательствылан – мутлан, пытартыш вашталтышлан да ешартышым пуртымылан, эскерымашым организоватлымылан да эртарыме методикылан, эскерышын шкем кучен моштымыжлан – поснак кугу тӱткышым ойырымо.
Участник-влак кокла гыч шукынжо ондак сайлымаште лийыныт, но ты программе шинчымашым уэмдаш да у условийлан ямдылалташ йӧным пуа. Курсым пытарымеке, йӱклымаш закон почеш эртарыже манын, эскерыше шамычлан кӱлеш материал ден инструкцийым пуат.
«Марийская правда» газетын архивше гыч налме фото.