Эртыше каныш кече-влак кундемыштына спорт мероприятий-шамычлан поснак поян лийыныт. Марий Элыште эше икмыняр Олимпийский чемпион-влак уна лийыныт.
23 февральыште Кортышто ечызе-влак коклаште «Шарнымашын гонкыжо» республикысе таҥасымашыште ече дене Олимпиадыште кум гана сеҥыше, Российысе ече спортын легендыже Юлия Чепалова лийын. Ты таҥасымаш Шочмо элым аралышын идалыкшылан да Кугу Ачамланде сарыште сеҥымылан 80 ий теммылан пӧлеклалтын. Олимпиадын чемпионкыжо ечыгорныш шогалше участник-шамычым саламлен. Таза илыш-йӱлам да спорт дене пеҥгыде кылым кучымыштлан тауштен. Ты мероприятий герой-влакым шарнымынам да жаплымынам пеҥгыдемдаш полша, манын.
Тылеч ончыч, 22 февральыште, Ю.Чепалова Марий кугыжаныш университетыште студент, ечызе, спортын ветеранже да ечым йӧратыше-шамыч дене вашлийын. Нунын тӱрлӧ йодышыштлан вашештен да шке опытшо дене палдарен.
Юлия – элнан ик эн тале ечызыже. Олимпийский модмашын чемпионжо лӱмым кум гана сулен, тӱнямбал чемпионатын кок гана чемпионкыжо лийын, тӱнямбал кубокын озаже. Российын сулло спорт мастерже. Тудын сеҥымашыже-влак ятыр ӱдыр-рвезылан пример улыт.
Марий Элысе Спорт министерствын ВК-се тӱшкаж гыч налме фото.