15 апрельыште Россий президент Владимир Путин Россий Правительствын членже-влак дене совещанийым эртарен. Пандемийлан кӧра нелылыкыш логалше бизнес предприятийлаште пашаеҥ-влаклан пашадарым тӱлаш манын, оксам ойыраш темлен.
«Нелылыкыш логалше изирак да кокла компаний-влаклан ешартыш финанс полышым пуаш темлем. Тиде окса шуйкалаш лийдыме задаче-влакым решатлаш кая. Икымше апрельлан организацийыште мыняр пашаеҥ улмым ончен, оксан кугытшым шотлаш тӱҥалына. Тыгодым йодмашым пуаш куштылго да йӧнан лийшаш», – каласыш В.Путин.
Тыгай йодмашым организаций-влак 1 май гыч пуэн кертыт. Кажне пашаеҥ ик тылзылан 12130 теҥгем налаш тӱҥалеш. Оксам апрельлан да майлан тӱлат.
Тылеч посна Путинын тыгайрак темлымашыже-влак лийыныт:
Системым ыштыше предприятий-влакын спискыштым ыштен шукташ. Тушко Россий экономикылан эн кӱлешан компаний-влакым пурташ.
Тыгай предприятий-влаклан льготный кредитым пуаш. Тыгодым пел кредитлан Минфин госгарантийым пуышаш.
Российысе авиакомпаний-влаклан полыш семын 23 млрд теҥгем ойыраш.
Регион-влакын бюджетышт нелылыкыш ынже логал манын, тушко 200 млрд теҥгем колташ.