Пошкырт кундем Уфа олаште «Мисс Содружество — 2023» моторлыкым да усталыкым ончыктымо республикысе конкурс эрта. Тений тушко тӱрлӧ национальностян ятыр ӱдыр ушнен, финалыш шым ӱдыр лектын. Марий ӱдырын чапшым Анастасия Белоусова арала.
Анастасия изинек марий шӱлышан кушкын. Ӱдырын ачаже Алексей Ахмазович Иванов ятыр ий «Юго» калык куштымаш ансамбльым, тыгак «Вӱд толкын» фольклор коллективым вуйлата. Пӱнчер тӱвыра полатыше вӱдышӧ методистлан тырша. Аваже Марина Андрияновна ансамбльыште мурен, куштен, пелашыжлан чыла шотыштат эреак полшен шоген (чаманен каласыман, тудо идалык ончыч илыш гыч каен). Садлан Анастасиялан марий калыкын куштымашыже, мурымашыже, йӱлаже, тӱвыраже, пайремже-влак чонжылан моткоч лишыл улыт. Ивановмыт ешыште марий шӱлыш эреак озаланен.
Анастасия шкеж нерген тыгерак каласкалыш:
– Мый Пошкырт кундем Мишкан район Пӱнчер ялын шочшыжо улам. Тыште моткоч поро чонан, пашам йӧратыше, икте-весым пагалыше да аклыше марий калык ила. Мемнан кундемысе марий-влак чимарий веран улыт. Акрет годсо йӱлаштым тачысе кече мартеат аралат. Ме мландын вийжылан ӱшанена, садлан шкенам пӱртӱсын икшывыже семын ужына. Калыкемын шуко йӱлажат лачшым пӱртӱс дене кылдалтын. Тидланже шкешотан правилым шуктыман, тудын дене мутланен моштыман.
Анастасия – Пошкырт кундемысе кугыжаныш университетым тунем лекмек, Пӱнчер тӱвыра пӧртыштӧ пашам ышташ тӱҥалын. Тушто тудо ачаж дене пырля «Вӱд толкын» фольклор коллективым вуйлата. Ты коллектив дене самырык тукымлан акрет годсо йӱлам шуктымым, калыкын ыштыш-кучышыжым, мурымашыжым, куштымашыжым, модмашыжым ончыктат.
Чолга ӱдыр тыгак тӱрлӧ конкурсышто шкенжым терга. «Ший памаш» конкурсышто 2017 да 2019 ийлаште таҥасен. Икымше ганаже кумшо вер дене палемдалтын гын, кокымшо гана I степенян лауреат лийын.
– Моторлык конкурсышто икымше гана шкем ончыктем. Тылеч ончыч мурымаш да куштымаш конкурслаште усталыкем дене палдаренам гын, ынде вес шӧрыныштат шкем терген ончынем. Ты конкурс гоч мый шке калыкемын поян йӱлаже да тӱвыраж дене палдарынем. Пошкырт республикыште марий-влак нерген утларак палышт манын тыршем. Конкурс нерген мыланем пашаште увертареныт да тушко ушнаш темленыт, мый келшенам. Тыге отборочный йыжыҥым эртымек, финалыш логалынам.
«Мисс Содружество — 2023» конкурсышто участниклан визитный картычкым ямдылыман ыле. Тушто Анастасия марий улмыж дене палдарен да усталыкшым «Аваем, ит вурсо» муро гоч почын ончыктен. Финал 15 гыч 21 апрель марте Уфа олаште эртаралтеш. Кызыт Анастасия тушто. Кажне кечын гаяк фотосессийым эртарат, видеом войзат, шке номерыштым ямдылат, келшымаш куштымашым да сценыш лекмым репетироватлат.
21 апрельыште конкурсын финалже эрта. Тушто участниклан визиткым уэш ыштыман, шочмо йылме дене азам малтыме мурым мурыман, уш-акылым тергыман, келшымаш куштымашым да усталык номерым ончыктыман.
Ме Анастасиялан сеҥымашым тыланена! Марий Эл гы Уфашке чон-шокшынам колтена!