Ачан вачыштыже – орденан китель, кидыштыже – салтак-эргыжын фотожо, а шинчаштыже – каласаш лийдыме ойго.
Марий Элыште «Геройын ачаже» фотопроект шке пашажым тӱҥалын. Ты фотовыставке «Эстафета Победителей» программылан келыштаралтын.
«Кугешнем! Марий Элыште илыше-влак эргымын лӱддымылыкшӧ нерген палышт!» – ойлат проектыш ушнышо пӧръеҥ-влак. Нунын коклаште – Волжский район Куршбал ял гыч Е.Микутов.
Евгений Васильевич – гвардийын старший лейтенантше, ВДВ-н 83-шо отдельный десантно-штурмовой бригадыжын ротыжын командирын алмаштышыже, Патырлык орден дене палемдалтше (колымекыже) Максим Микутовын ачаже. Шочмо эл верч шогымо годым М.Микутов 2022 ий 12 апрельыште геройла колен.
Максимын Юлия пелашыж дене интервьюм «Кугарня» газетын 2023 ий 9 октябрьыште лекше номерыштыже савыктыме.
Евгений Васильевич деч Максим нерген каласкалаш йодна.
Ялысе рвезе
– Максим тыглай ялысе рвезе кушкын, кок шӱжаржылан ӱшанле эҥертыш лийын. Шке таҥаш рвезе-влак дене футболла, лаптала модаш йӧратен. Паша дечат шылын огыл. Ме тудым ответственный лияш, тӱҥалме пашам мучаш марте шукташ изинек туныктенна.
2003 ийыште Сотнур школышто военно-патриотический объединений-влакын икымше республиканский слётышт эртаралтын. Мый слётын организационный штабшын еҥже лийынам, садлан 9 ияш Максим кас еда школыш пырля коштын да участник-влакын таҥасымашышт, занятий-влак кузе эртаралтмым тӱткын эскерен. Тунамак рвезе-шамычын командыште икте-весылан полшымышт, эҥертымышт йоча чоным тарватен дыр, шонем.
8-ше классыште Максим кадет направлений дене тунемаш тӱҥалын. Ныл ий жапыште эргынан палынак вашталтмыжым тунам шекланенна: тыматлырак, пеҥгыдырак, чытышырак лийын. Школышто кадет классыште тунемше-влак чолгалыкышт, икте-весылан эре полшымыж дене ойыртемалтыныт. Шке классыштыже Максим чолга лидер ыле манаш ок лий. Но, пырля тунемше-шамычын палемдымышт почеш, тудлан нуно кеч-кунам эҥертен кертыныт – нигунам «огым» манын огыл. Максим чын да ӱшанле йолташ лийын.
«Формым налам, тунемаш пуренам!»
Школ деч вара Рязаньысе гвардейский кӱшыл юж десант училищыш тунемаш пураш шонен. Конкурс кугу ыле, ик верыш – 6-7 еҥ. Шке вий дене, чыла тергымашым эртен, тунемаш пурен кертын. Кӧргыштыжӧ ташлыше куанже нерген эн ончыч мыланна йыҥгыртен каласен. «Формым налам, тунемаш пуренам!» манын пелештен. А вертолёт гыч парашют дене икымше гана тӧрштымекыже, мландымбак волен шогалмек, иканаште мыланна йыҥгыртен. Кумшо гана тыге тӧрштымекыже, курсант-шамычлан берет ден тельняшкым кучыктеныт да десантный братствыш пуртеныт. Тидын годымат Максим шке сеҥымашыж нерген мыланна йыҥгыртен каласен.
Иктаж-мом ыштен кертын огыл гын, нигунам вуйым сакен огыл. Школышто налме шинчымашыже училищыште сайынак полшеныт. Оружийым йӧратымыже ведомственный инструктор ден судья-влаклан практический лӱйкалымаш дене курсым эрташыже полшен, сӱретлаш йӧратымыже боевой листок-влакым лукмаште кӱлеш лийын. Максим вес еҥ дене кылым вашке муын моштен, эргына илышлан куаныше, поро ыле.
22 март годсек
Распределений почеш Приморский крайыш служитлаш кайымекыже, мӧҥгӧ шуэнрак толеден. Тунам тудо серьёзныйрак, тыматлырак, чыла шотыштат пеҥгыдырак лийын манын, пелашем дене шекланенна, тидын годымак нойымыжат шижалтын.
Пырля служитлыше-шамыч дене пырля Максим 2022 ий 22 мартыште СВО кайыме верыш логалын, тунамак телефонжым йӧртен. 2022 ий 10 апрельыште, рушарнян эрдене, йыҥгыртен. Теҥыз воктене улам, игече пеш сай, леве манын ойлен. Йӱкшӧ весела ыле, мыскарамат ыштен. Пелашыж ден эргыже Уссурийскыште лийыныт, нунылан йыҥгыртен кертын омыл манын палдарен. А кок кече гыч, Мариупольым утарыме годым, Максим геройла колен.
Пытартыш гана Куршбал ялыш эргына аважын шочмо кечыжлан 2020 ий ноябрьыште толын, Аван кечыже ыле. Иктыланат ойлыде. Тылеч ончыч пел ий Сирийыште служитлен. Тидын нергенат мыланна ойлен огыл – тургыжланаш тӱҥалына манын шонен. Тунамсе вашлиймаш кызытат чоным ырыкта. 2022 ий февральыште ешыж дене отпускыш толшаш ыле.
Булат – коча-кован куанже
Кугу куанна – ныл ияш Булат уныкана. Максимым тойымо годым икымше гана тудым ужынна – эргынан Юлия пелашыж дене Уссурийск гыч Максимым пытартыш корныш ужаташ толыныт ыле. Икымше гана вашлийме годымак талук да кок тылзаш ньога, кидшым шуен, мый декем толын. Тудым чот йӧратена. Лач Булат мыланна ты ойгым илен лекташ полшен. Каникуллан да пайрем канышлан мемнан дене ялыште шога. Ачаж гаяк чулым. Вольыкым ончаш эре полша. Ялыште тудлан йокрок огыл, вет ме чыла пырля ыштена: тракторым ачалена, кӱмыж-совлам мушкына, кеҥежым пакчаште вӱдым шавена, велосипед дене кудалыштына, сӱретлена, мурым мурена. Кушкын шумекыже, тудо чын пӧръеҥ, Шочмо элнам аралыше лиеш манын ӱшанена.
«Геройын ачаже» проект эргым верч кугешнымашым ончыкташ, тыгодымак каласаш лийдыме ойгым почын пуаш, салтак-влакын подвигышт дене кушкын толшо тукымым палдараш йӧным ышта.
«Защитники Отечества» фондын Марий Элысе пӧлкажын архивше да еш альбом гыч налме фото-влак.