Верысе самоуправлений орган-влакын 2020 ийысе лектышыштым 10 показатель дене терген лекме. Тыгодым экономикым вияҥдыме, пӧрт-влакым чоҥымо, корным тӧрлымӧ, образованийыште ончыко кайыме, верысе бюджетым ешарен толмо да моло паша-влакымат радамлыме.
Марий Эл Республикысе Правительствын пунчалже дене 7 сеҥышым палемдыме. Курыкмарий район администрацийын пашажым 1-ше вер дене аклыме, Килемар районым – 2-шо вер дене, Советский районым – 3-шо вер дене. Тылеч вара «Йошкар-Ола» ола округ, Медведево, Оршанке да Параньга район-влак каят.
Наталья Арганякова, Курыкмарий районысо администрацийым вуйлатыше:
– 2020 ийыште районысо бюджет 2019 ий дене таҥастарымаште 109,8 процентлан кушкын. Тышке налоговый да налоговый огыл доход-влак пурат. «Комплексное развитие сельских территорий» программе почеш Макарсир, Кугилӓнсола, Цигӓнсола, Шӹргӹдӹр яллаште газым пуртымо. 1 меҥге утла шуйнышо Микрӓк-Петухсола кугорным ыштыме, тыгак Озёркадӹр ялысе, Виловат селаште уремлам тӧрлымӧ. Йоласал селаште вӱд башньым олмыктымо. Республикысе адресный программе почеш Озёркадӹр ден Мамарихӓ яллаште шуко пачашан пӧртлаште леведышым, фасадым олмыктымо. Тылеч посна республикым социально-экономически вияҥдыме программе дене келшышын, вич контрактым ыштыме да экскаваторым, автомастерской-автомобильым, тракторым да кок ассенизаторский машинам налме. «Культура», «Формирование комфортной среды», «Спорт – норма жизни» да моло нацпроектла, верысе инициативе программе денат ятыр сай сомыл шукталтын. Чылаже 152 социальный контрактым ыштыме, тышеч индешыже – еҥ-влаклан бизнесым вияҥдаш полшышо. Кок ешлан илыме верым налаш 1 млн 375 тӱжем теҥгем ойырымо.