Йошкар-Ола администрацийыште «МолодЙошка» молодёжный проект-влак конкурсышто сеҥыше-шамычым палемденыт.
Конкурсым «Развитие физической культуры, спорта и молодёжной политики в городском округе «Город Йошкар-Ола» муниципал программе почеш эртарат. «Спорт да тазалык» номинацийыште Глеб Докукин, «Усталык» номинацийыште Вадим Елькин, «Патриотизм» номинацийыште Алёна Исаева ден Юлия Фокина ойыртемалтыныт. Нунылан 100000 тӱжем убсидий ойыралтеш.
«Патриотизм» проектын авторжо Оксана Геннадьевна Купцова Йошкар-Оласе 28-ше номеран лицейыште англичан йылмым туныкта, филологий науко кандидат, доцент, регионысо инноваций площадкын вуйлатышыже. Проектын вуйлатышыже Алёна Игоревна Исаева 28-ше номеран лицейыште физикым да информатикым туныкта.
Нунын проекыштт Йошкар-Олаште шочын-кушшо, Кугу Ачамланде сарын, XX да XXI курымласе локальный кофликт-шамычын, специальный военный операцийын участникше-влак нерген шарнымашым аралымылан да нунын нерген калык коклаште палдарымылан виктаралтын. Салтак-влак нерген оласе школлаште тӱрлӧ гражданско-патриотический да военно-спортивный мероприятий гоч палдараш тӱҥалыт.
– Ты проект шкешотан да ойыртемалтше. Тудо икмыняр блок мероприятий гыч шога. Тыге, мутлан, икымше блок историко-культурный да трудовой воспитанийлан виктаралтын. Тидлан Йошкар-Оласе 28-ше номеран лицейыште тунемше-шамычын ешыштышт Кугу Ачамланде сарыште, локальный конфликтлаште, спецоперацийыште участвоватлыше участник-влак нерген интерактивный экспозицийым чумыренна.
Кокымшо блок военно- да гражданско-патриотический воспитанийлан келыштаралтын. Тидлан «Защитники Отечества» кугыжаныш фондын Марий Элысе пӧлкаж дене пырля пашам ышташ кутырен келшенна. Нунын полшымышт дене XX да XXI курымласе локальный конфликтлаште да СВО-што участвоватлыше ветеран да салтак, МВД пашаеҥ-влак дене вашлиймашым эртараш палемденна. Тыгак йочасадыш коштшо да школлаште тунемше ӱдыр-рвезе-шамычлан военно-патриотический спектакль-влакым ончыкташ шонена, – каласкала проектын авторжо О.Купцова.
Проектын партнёржо-шамыч дене пырля 28-ше номеран лицейын ныл выпускникшлан пӧлеклалтше Шарныме кечым эртараш палемдыме. Нуно СВО-што геройла коленыт, Патырлык Орденын кавалерже улыт. Салтак-влак лӱмеш лицейын кумдыкыштыжо «Шарнымаш аллейым» шындышаш, школ пырдыжеш мемориал оҥам пижыктышаш пеҥгыдемденыт. Тыгак тунемше-влаклан эртаралтше да салтак-влаклан пӧлеклалтше оласе балыште участвоватлаш шонат.
– Кумшо блок военно-спортивный мероприятий-шамычым эртарымылан келыштаралтын. Тидлан «Йошкар-Ола» ола округ администрацийын образований управленийжын да «Единый Россий» партийын Марий Элысе исполнительный комитетшын полшымышт дене «Ача дене татамиште» флешмобым, «Zарница: наследие» военно-спортивный модмашым да муро строй дене коштмаш конкурсым эртарена. Тидыже ӱдыр-рвезе-шамычым таза илыш-йӱлам кучаш, патриотизм шӱлышым пеҥгыдемдаш, команде дене пашам ышташ туныкташ виктаралтын, – палдара проектын вуйлатышыже А.Исаева.
Самырык туныктышо-влакын проектышт, чынжымак, шкешотан да ойыртемалтше. Икмыняр блок гыч шогышо мероприятий-шамычын шонымашыштат икте – самырык тукымым элнан историйжым шарнаш да пагалаш кумылаҥдаш, мемнан тыныслыкна верч илышыштым чаманыде тушман ваштареш шогышо салтак-влакым палаш.
Автор-влакын палдарымышт почеш, «Zнамя Победы: наследие и будущее» проект 600 наре ӱдыр-рвезылан мероприятийым эртараш келыштаралтын.
А.Исаеван колтымо фотожо-влак.