Параньга посёлкышто «Тимер» спортклуб тений шке омсажым почын. Тудым СВО-н участникше, пауэрлифтинг дене Российын спорт мастерже, тӱнямбал классан спорт мастер Ислам Шагиев чумырен.
Кугу шонымашын пӱрымашыже
И.Шагиевын шке спортклубым почмо верч чонжо эреак йӱлен. Тылеч ончыч тудо Параньга посёлкышто спортым да физкультурым вияҥдыме рӱдерыште пауэрлифтинг дене тренер-преподавательлан тыршен. Тӱрлӧ амаллан кӧра тушеч каяшыже логалын. Тыгодым эреак шке пашам вораҥдараш тӱналме нерген шонен. Пиалешыже Параньга посёлкышто яра шинчыше ик зданий улмо нерген ойленыт. Ты зданийым Ислам Мансурович налын. Зданий уло, но тудым шотыш кондаш, олмыкташ кугу шийвундым луктын пышташ кӱлын. Тидланже Ислам Шагиев тора кундемлашке чоҥымо пашашке кудалыштын.
Варажым элыштына мобилизацийым увертареныт. И.Шагиев шке семынже повесткым вучен илен, СВО-ш колтат манын шонен. Но повестке толын огыл. Тылеч вара Ислам Мансурович СВО-ш каяш йодмаш дене отбор пунктыш шке йодын миен. Медкомиссийымат эртен. Но военкоматыш тудым тылзе гыч веле ӱжыктеныт.
Шке кумылын
2023 ий 4 февральыште Шагиев СВО-ш каен. Салтак «Тимер» миномётный батальоныш логалын. Ончычракше бой-влак кайыме верын кокымшо-кумшо линийыште кредалын. Тушто нуным ончылнырак кредалаш ямдыленыт, тӱрлылан туныктеныт.
– Сарыште улат гынат, тӱрлӧ сомылым вораҥдарыман. Тидыже кочкаш ямдылыме, илыме верым шотыш кондымо да моло шотыштат палдырнат. Кушто мый лийынам, кредалмаш-влак, чынжымак, талын каеныт. Чаманен каласыман, ятыр рвезе ты илыш гыч каен. Мемнан тӱҥ задачыланна миномёт дене тушманын вийжым пытарымаш шотлалтын, – каласкалыш И.Шагиев.
Землякнам сӧйыштӧ шкенжым лӱддымын ончыктымылан да боевой задаче-влакым сайын шуктымылан Россий Президент В.Путинын Указше почеш Жуковын медальже дене палемденыт.
– Ме мланде йымалне верланыше окопышто иленна. Тусо климатым чыташ лиеш, тӱҥжӧ тазалыкет пеҥгыде лийже. Айдемын организмже сайын пашам ышта гын, чот шокшым але, мӧҥгешла, йӱштымат чытен сеҥа. Но тидлан, мутат уке, шкем физически шуарыман. Тушто йӧн лекме семын спорт дене заниматленам. Вет мый спортышто шукертак улам, садлан тудын деч посна икмыняр кечым эртарем гын, йӧндымылыкым шижам. Самырык годсек илыме режимыштем тудо кугу верым айлен. Мыйым ончен, моло-влакат тидлан кумылаҥыныт, – манеш Ислам Мансурович.
И.Шагиевын 50 ийыш шумыж дене Обороно министерстве дене контрактше кӱрылтын. Тыге 2023 ий августышто мӧҥгыжӧ пӧртылаш логалын.
СВО деч вара
СВО-што кредалше салтак-шамычлан кугыжаныш могырым тӱрлӧ выплате пуалтеш. Тушто лиймылан тӱлымӧ оксам Ислам Шагиев чыла спортклубыш пыштен, манаш лиеш. Вет тренер ты сомыллан эше СВО-ш кайымыж деч ончычак пижын ыле. Толмекыже, чонжо да вуйжо дене ты пашалан пижын. Чоҥымо пашаште тыршымыже зданийыште ремонтым ыштымаште кугун полшен. Чыла сомылым Шагиев шкеак виктарен. Тудын ойлымыж почеш, 90 процент пашажым шке шуктен гын, 10 процентшылан еҥым йодаш логалын. 2024 ий 26 февральыште «Тимер» клуб шке омсажым спортым йӧратыше-влаклан почын. Тудым почмашке Шагиевын СВО-што пырля лийше йолташыже-влакат толыныт. Спортклублан батальонжын лӱмым пуэн.
– Таче мый шкежат ӧрам: кузе кӱчык жапыште шӱкшӧ зданий гыч тыгай спортклубым ыштен сеҥенам. Конешне, чоҥымо, олмыктымо пашалан шуко окса кӱлеш. Тидыжат, очыни, тӱҥалтыште шкешотан чаракым ыштен. Клубышто тазалыкым пеҥгыдемдаш келшыше тӱрлӧ тренажёрым вераҥдыме. Тидланат шагал огыл оксам луктын пышташ логалын, но тудым наледаш полшышо-влаклан кугу таум ойлынем.
Клубым почмо деч вара школышто тунемше рвезе-шамыч вигак толаш тӱҥальыч. Нуно ты клуб почылтмо нерген ончылгоч паленыт. Садлан шукертак ты татым вученыт. Тренировко-влак кажне кечын эртаралтыт. Кугыеҥ-шамычланат тӱрлӧ тренажёрышто заниматлаш лиеш. Кумылан-влак коштыт, – мане Шагиев.
Спортлан кумылаҥда
Ислам Мансурович пауэрлифтинг дене спортсмен-шамычым тренироватла. Ты спортлан кумылан рвезе-влак Параньга посёлкышто шагалынжак огытыл. Нуно тӱрлӧ таҥасымашыште вийыштым тергат. Сеҥымашышт дене куандарат. «Тимер» спортклубыштат икмыняр гана пауэрлифтинг дене таҥасымаш-влак лийыныт. Тушко республикнан тӱрлӧ районжо гыч спортсмен-влак погыненыт. Палемдыман, ты клубышто Параньга кундемын шочшыжо, СВО-што ӱмыр лугыч лийше салтак Ильназ Фамилий лӱмеш турнир эртаралтын. Шке жапыштыже салтак пауэрлифтинг дене заниматлен.
«Тимер» спортклуб идалык наре веле пашам ышта гынат, тушко коштшо-влак шагалынжак огытыл. Ислам Шагиевын ойлымыж почеш, тудын тӱҥ направленийжылан самырык тукымым спорт дене заниматлаш да таза илыш-йӱлам кучаш кумылаҥдымаш шотлалтеш. А Шочмо эллан таза, виян, патриот шӱлышан рвезе-шамыч кӱлыт. Тидыжым тудо СВО-што лиймыж годым эше ик гана умылен.
Авторын фотожо-влак.