Н.Никитина Пермь областьысе Нововильвенский посёлкышто шочын. Икмыняр жап гыч тӱрлӧ амаллан кӧра ешыже Советский районысо Тапшер ялыш илаш куснен. Тушто ӱдырын кочаж ден коваже иленыт.
Наташа деч посна ешыште эше кок ӱдыр кушкын. Сандене авалан да ковалан полшаш манын, нуно кочкаш чӱчкыдын шкеак шолтеныт, когыльым кӱэштыныт, эсогыл пайремлан тортымат ыштеныт. Южгунам акак-шӱжарак-влак шке коклаштышт кӧн тортшо эн тамле лиеш манын ӱчашеныт.
Кажне йоча изиж годым тӱрлӧ профессийым ойырен налаш шона. Наташат тыгак. Туныктышо, врач, воспитатель, кевытче лияш шонен. Школым тунем пытарымеке, шӱжарже дене пырля тудо кӱшыл тунемме заведенийыш пураш шонен, но балл ситен огыл. Тыге ӱдыр-влак Советский районысо Вечын училищыш логалыныт.
«Ик ий арам ынже эрте манын, училищыш электриклан тунемаш пураш шонен кайышна. Приёмный комиссийыште улшо еҥ-влак, «Тиде паша ӱдырлан йӧршӧ огыл» манын, мемнам повар-кондитерлан тунемаш колтышт. Тыге ме тушто кок ийлан кодна. Тунемме жап эн весела лийын, ушышто волгыдо шарнымашым коден», – каласыш Наталья.
Училище деч вара аваже икшывыж-влаклан умбакыже тунемаш каяш темлыш. Тыге Наташа ден Света шӱжарже Оршанкысе педколледжыш производственный обучений мастерлан тунемаш пуреныт. Кум ий гыч, йошкар дипломым налмеке, пӱрымаш Наташам Москваш наҥгаен.
Москва
«Москваш мийымек, илышем вашталте. Эн ондак тыглай пиццерийыште ыштенам. Тушто ме шкегыч утыжым нимом шонен огынал, ямде технологий дене пайдаланен, пирожныйым да моло кочкышым ямдыленна. Мутат уке, тунем гына лектын, вигак сай пашаш логалаш неле манмым умыленам. Тидлан эре тунемман, пашам кыртмен ыштыман. Тыршымашет уло гын, тунам гына шонымашышке шуын кертат.
Икмыняр жап гыч Марий кугыжаныш университетыш заочно тунемаш пуренам.
Туге гынат ны Оршанкысе педучилищым йошкар диплом дене тунем пытарымым, ны МарГУ-што тунеммым мый кугу кӱкшытлан ом шотло. Вет пашаштына эн тӱҥжӧ – мастарлык. Сандене у паша верыште дипломым йодмеке, мый «Повар. Кондитер» манын возыман документым ончыктем», – умбакыже каласкала Н.Никитина.
Натальян кокымшо паша верже кумдан палыме актёр Сергей Безруковын театрыште (Москосо Губернский театр) лийын. Тушто ӱдыр театр пашаеҥ, палыме артист-влаклан кочкаш ямдылен. Театр гыч самырык повар «Novotel Москва сити» отельышке кугурак кондитерлан пашам ышташ куснен.
Кондитер
Лач «кондитер пашаште мый кугу опытым погенам. Шеф-кондитерын полышкалышыж семын кочкышым сӧрастараш, мастичный тортым ышташ, шоколадым левыкташ да эше шуко-шуко вес пашам ышташ тунемынам. Кызыт мый «Swissotel Красные Холмы» отельыште шеф-кондитерын алмаштышыже улам. Тыште ме пирожныйым, рулетым, когыльым, макаронецым, кексым ыштена, шкеак киндым кӱэштына. Кажне пайремлан тӱрлӧ форман шоколадым луктына, йодмо почеш торт-влакым ямдылена.
Отельысе кажне уналан комплиментым ыштена: фруктан вазым, шере боксым, макаронец але шоколад кампеткан пӧлекым кучыктена. Уна лӱмлӧ еҥ гын, тудын йӧратыме пашажлан келшышым ыштена. Мутлан, футбол дене чемпионат эртыме жапыште мемнан дене футболист-влак иленыт. Тунам ме мече форман комплиментым ыштенна. Мемнан деке чӱчкыдын кумдан палыме ик музыкант толеш. Пошкудо Музык полатыште тудо кажне ийын концертым эртара. Тудлан ме ното форман комплиментым кучыктена. Кодшо ийын шочмо кечыжлан фрак форман тортым пуэнна, тений – фруктан корзиҥгам. Але теве кумдан палыме Российысе ик актёр «Зенит» футбол» командын болельщикше улеш. Тудлан ме тиде командын логотипшан шере кочкышым кучыктенна».
Тиде пашаште Наталья моштымыжым тӱрыснек почын ончыктен кертын. Вет тудо шкеак десерт, тортым-влакым шона, нуным сӧрастара. Тылеч посна пекарьын, технологын, кондитер-скульпторын сомылжым шукта, технологический карте-влакым ышта.
Пиалан ава
Наталья пашаште гына огыл, мӧҥгыштат лишыл еҥже-влакым тамле кочкыш дене куандараш тырша. Кандаш ияш Кира да ныл ияш Паолина ӱдыржӧ-влак авашт пелен шкештат кочкаш шолташ тунемыт.
«Ӱдырем-влак дене ме чизкейкым, печеньым, когыльым, пиццым кӱэштына. Кугурак ӱдыремлан руашым лугемат, тудо шкеак мелнам ышта. Пашалан кӧра, жапым нунылан шагалрак ойырем. Туге гынат пелашем дене нуным куандараш тыршена, зоопаркыш але каныме верлашке коштыктена».