Эртыше кечылаште Москошто студент-влаклан «Твой ход — 2022» Российысе форум пашажым тӱҥалын. Тушто «Идалыкын студентше» национальный премийым налше еҥым палемдат. Ты еҥын лӱмжӧ 16 декабрьыште пале лиеш.
Тушко элнан 70 регионжо гыч 1000 наре еҥ ушнен. Нунын коклаште – Марий Элысе олимпийский резерв училищын студентше Егор Кузнецов. Егор тыгак – кундемыштына спорт подготовкым эртыше рӱдерын тале спортсменже. Тудо «Идалыкын спортсменже» номинацийышке шке кандидатуржым темлен. Моло участник-влак семынак тӱрлӧ конкурсышто шке вийжым терген. Тыгай конкурсышто тунеммаште, шымлымаште, спортышто, усталыкыште да мер пашаште ойыртемалтше студент-влак таҥасат.