Ӱдыржӧ деке унала

 

Нылле ий ончыч кугу капан, канде шинчан, мотор капкылан рвезе дене палыме лийынам. Келшенна. Марлан лекташ пӱралтын огыл, но тудын деч ӱдыр йочам ыштенам. Икшывем шочмо ачажын сынжым налын.

Ты рвезын ончыкылык илышышкыже ме пурен огынал, тудо наркотикым ойырен. Тыге мемнан кылна лушкыдемын. Тылеч вара мый марлан лектынам. Пелашем ӱдырем шке шочшыжо семынак йӧратен. Но мемнан пиалан илышнам ӱмыр лугыч лиймыже кошартыш. Эше пел ий гыч ӱдыремын шочмо ачажат передозировко дене колыш. Самырык ӱдырамаш кок йоча дене кодым. Пелашем деч эргым ыштенам. Тудын да ӱдыремын ачажын фотокартычкыштым ончен, чӱчкыдын шинчавӱдым луктынам. Тидым ӱдырем шекланен да фотокартычкысе могай айдеме верч тынар тургыжланымем умылкалаш тӱҥалын. Тыге тудлан шочмо ачаже нерген чыла чыным ойленам.

Шке пелашемым чӱчкыдын омыштем ужынам, ӱдыремын ачажым ик ганат уке. 31 ий эртымек, тудат омышкем вучыдымын да шиждымын толын лектын. Мый пуйто эмлымверыште улам. Тудо мыйым ужаш толын, ӱдырна дене лиймыже, тудлан шкеж нерген палдарымыже шотышто ойла. Ӱдырна тудым шыдын вашлийын да «ондакырак тыйын нерген палем гын, пуштам ыле дыр» манын. Тудо сырен да омсам чот тазан лупшалын каен. Омыштем чот шортын, ораде койышыжлан кӧра мыйым да ӱдырем йомдарымыжлан ӧпкелен. Тылеч вара мыйым уло кертмыж дене ӧндалын, шӱргем шупшалын да йомын.

Эрдене ӱдырем деке йыҥгыртышым, шочмо ачаже омыштыжо кончен але укем йодым. Тудо мыланем тыге ойлыш:

Омыштем кончен огыл, но шкеже толын каен. Пелашем дене балконышто тӱрлӧ нерген кутырен шинченна. Трукышто чонемлан вуж, капемлан шокшын чучын колтыш, пуйто мыйым ала-кӧ ӧндале. Ты жапыштак ачам нерген мутланымаш ылыже. Пелашем тӱрлым йодышто, мый тудлан «ондакырак тудын нерген пален налам гын, пуштам ыле дыр» маньым. Тылеч вара балкон ден пачер омсан тӱчылтмӧ йӱк шергылте. А вет омса-шамычым петырыме ыле. Вигак йӱштын да лӱдыкшын чучын колтыш. Тугеже тый тыште лийынат да мыйым колынат аман манын шоналтышым.

Марина К.

Йошкар-Ола.