Марий Эл гыч СВО-н ветеранже Дмитрий Глушков – лӱйкалымаш дене Элым аралыше-влакын Российысе кубокыштыжо лу эн тале-шамыч радамыште.
Ушештарена, республикыштына паралимпиец-влаклан «Сильные духом» сборный командым чумырымо. Тушто специальный военный операцийыште нелын сусыргышо ветеран-шамычлан тренироватлалташ тӱрлӧ йӧным келыштарыме. Ты сомылым Российысе «Защитники Отечества» фондын Марий Элысе филиалже вораҥдара. Йошкар-Ола гыч Д.Глушков республикысе паралимпиец-влак сборный командын ик спортсменжылан шотлалтеш. Салтак шке кумылын СВО-ш каен, тале кредалмаш годым нелын сусырген. Тидлан кӧра капкылысе кӱшыл ужашыжын икмыняр вержым пӱчкыныт. Землякнам «За отвагу» медаль дене суапландареныт.
Дмитрий, кужу жап реабилитацийым эртымеке, кундемысе паралимпиец-влакын толкынышкышт ушнен, пулевой лӱйкалымаш спортлан кумылаҥын. Кажне кечын тренировкылаште мастарлыкшым шуарен. Элым аралыше-влакын кубокышт верч окружной таҥасымашыште вич эн тале-шамыч радамыш логалын. Варажым, Российысе паралимпиец-влакын сборный – командыж дене пырля тренировкшамыч коклаш логалын.
«Защитники Отечества» фондын Марий Элысе пӧлкажын сайтше гыч налме фото-влак.