Российысе «Динамо» тазалыкым пеҥгыдемдыме обществым ыштымылан 100 ий темын. Ты лӱмгечылан пöлеклалтше мероприятий кодшо кугарнян, Марий Элысе МВД коллегийын залыштыже эртаралтын.
«Динамо» обществыште шуаралтше еҥ-влак спортын тÿрлö видыштыже шке мастарлыкышт дене ойыртемалтыныт. Нуно Олимпийский модмашыште, Европысо да тÿнямбалысе чемпионатлаште ик гана веле огыл чемпион лÿмым суленыт. Ты обществылан кӧра кундемыштына да элыштына тӱрлӧ кредалмаш, лӱйкалымаш спорт-влак вияҥын толыныт.
Лӱмгече пайрем годым кундемыштына ты обществын ончыко вӱдышӧ еҥ ден ветеран-влакым саламленыт, физический культурым, спортым вияҥдымыштлан тауштеныт.