Пытартыш 40 ийыште телым кокла шот дене 9,2 градус йӱштӧ шога. Эн йӱштӧ (-10,3) январьыште лиеш, декабрьыште – 7,6; февральыште – 9,7 градус йӱштӧ. Шӱдӧ ий ончычсо жап дене таҥастараш гын, теле 3,3 градуслан левештен. Тений декабрьыште 4-5 градуслан йӱштырак лийшаш.
Южо ийлаште теле чатлама йӱштыж дене поснак чот лӱдыктен. Теве 1979 ийыште термометрын столбикше 43 градус марте волен, а Морко районышто –47 градус мартеат. 1987 ийыште 40 градус марте юж йӱкшен, 2006 ийыште 39 градус йӱштӧ лийын.
Телым левештенат кертеш. Пытартыш жапыште 2009 ден 2010 ийлаште южо кечын 7 градус леве лийын. 2015 да 2016 ийлаште 0 градус деч утларак 20 кече шоген, 2002 да 2020 ийлаште – 27 кече, а 2007 ийыште – 31 кечат.
Пытартыш 42 ийыште телым йӱрат эре гаяк йӱрын. Теве 2015, 2018, 2020 ийлаште шым кече йӱран лийын, 2016 ийыште – лу кече.
А 1987, 1992, 1994, 2003, 2011, 2019, 2021 ийлаште плюсан температур лийынат огыл.
Пытартыш кандаш ийыште (2020 ден 2021 ийла деч посна) эртыше 22 ий дене таҥастарымаште лум шукырак лумын. 2022 ий поснак луман лийын. Кокла шот дене декабрьыште лум мландым 33 см, январьыште 35 см, февральыште 24 см кӱжгытын леведеш. Тений икымше лум деч вара 19 кече гычак лум возын.
Геннадий Рыбаков.
Йошкар-Ола.