Декабрьыште да апрельыште пале лиеш

 

 

Российысе переписьын икымше этапше 14 ноябрьыште пытен. Кызыт тудын кокымшо этапыштыже данный-влакым шотыш кондымо паша шукталтеш.

Эн ончыч увертарыме почеш Госуслуго гоч 8 ноябрь марте возалташ лийын гын, варажым тудым 14 ноябрь мартеак шуйымо. Тыгай йӧн дене ончылгоч шотлымо почеш Марий Элыште 21 процент еҥ пайдаланен.

Но чын цифр-влак нерген ойлаш але эр, данный-влакым идалык мучко шотлат да тергат. Икымше данный-влак декабрьыште пале лийыт гын, варажым тӱҥ чот дене Маристат 2022 ий апрельыште палдарышаш. Перепись икмардан каен: 1229 переписчик ик тылзыште чыла пӧртым коштын савырнен.