Чылажат калыклан вияҥаш

Марий калыкын ныл ий ончыч эртыше X погыныштыжо Мер каҥашлан шукташ икмыняр пашам посна пункт дене палемден кодымо лийын. Иктыже – республикыште палыме да чапланыше еҥ-влаклан монументым ямдылыме пашам ворандараш. Мо ышталтмым оньыжа Э.В.Александров деч пален нална:

Памятник-влакым Марий Эл Республиклан 100 ий темме вашеш ямдылаш тарваныме: композитор Андрей Эшпайлан, поэт Валентин Колумблан да Марий облисполкомын икымше председательже Иван Петровлан. Проект почеш, чылажымат 2021 ийыште ыштен шукташ палемдыме. А кызытеш шинчалан койдымо пашам ыштыме. Конкурс эртен, эскиз-влакым ойырен налме. 1 октябрьыште музыкальный училище воктене, Я.Эшпай лӱмеш памятникым шогалтыме вереш, шарнымаш кӱ пышталтеш.

Тылеч посна икымше марий газетым лукмаште тыршыше Павел Петрович Глезденёвлан 2017 ийыште Киров олаште шарныктыш оҥам почмо. Тиде йодышым 2016 ийыште погын годым «Марий Эл» газетын тӱҥ редакторжо Александр Саликович Абдулов нӧлталын да шарныктышым ышташ темлен ыле. Йошкар-Олаштынат ынде просветительым ушештарыше вер уло. Мер каҥашын темлымыж почеш, тений кеҥежым 9-ше микрорайонышто Йыван Кырла урем воктене верланыше скверлан Глезденёвын лӱмжым пуаш палемдыме. Оласе парк ден скверлам тӱзатыме шотышто йӱклымаш деч вара калык тиде кумдыкым ойырен, каныме верым тӱзаташ окса палемдалтын. Пашам 2021 ий кеҥежым ыштен шуктышаш улыт. Тыгак скверыште монументым ямдылат. Тудо марий тамга-влак дене сӧрастаралтеш. Ӱшанена, кажне ийын 6 апрельыште, Марий талешке кечын, тыште шуко еҥ погына.

Самырык-влак дене пашам ыштыме шотыштат йодмо шуэш...

Кушкын толшо тукымым мер пашашке мыняр-гынат ушен кертме. Ныл ий жапыште тӱрлӧ семинар, погынымаш, слёт-влак эртаралтыныт. Паша арам лийын огыл, шонем. Самырык-влак кокла гыч кӧ чолгалыкым ончыктен гын, южышт илышыштышт ӱшанле ошкылым ыштеныт: кугыжаныш учрежденийлаште пашам ыштат, вуйлатыше кӱкшытышкат шуыныт, мер сомылым шуктат. Тыгодым кушкын толшо самырык тукымым почешышт наҥгаят.

Самырык мер ушем-влак коклаште, мутлан, «У вий», «ВийАр» организацийла гыч еҥ-влак мероприятийыште шке вийыштым, мастарлыкыштым ончыктат. Шкеат тӱрлӧ погынымаш-влакым эртарат.

Ты аланыште вияҥаш тӱшка увер йӧнат кугу шӱкалтышым ышта. Тыште Марий Эл радиом палемдыде огеш лий. Тудо тӱрлӧ ийготан еҥ-влакым иктеш чумыра, тусо пашаеҥ-влак самырык да чолга улыт. Концерт-влакымат нуно кызытсе жаплан келшышын ямдылат. Газет редакций-влакын пашаштым палемдыде огеш лий. Тыге кушкын толшо ӱдыр-рвезе-влакым, марий калыкым, марий йылмылан, марий мурылан кумылаҥдат.

Икманаш, чылажак шинчалан огеш кой гынат, ме шонымо, палемдыме пашам шуктен толына. Чылажат калыклан вияҥаш ышталтеш.