Чыла вере шуаш тырша

Самырык жапым ик верыште шинчен эртарыман огыл – тÿрлö вере шке мастарлыкым нöлтыман. Тыге тÿняумылымашна вестÿрлö лиеш, уш-акылна у шинчымаш дене пойдаралтеш. Теве Шернур посёлкысо 1-ше номеран школын 8-ше  кадет классыштыже тунемше Дима Веденькин шке мастарлыкшым тÿрлö шöрын гыч нöлта. Тудо почеламутым сылнын лудеш, сайын мура, сценкыште устан модеш, проектым арала.

Мураш чон ÿжеш

Дима Шернур район Чылдемыр ялыште шочын-кушкын. Куд-шым ий ончыч ешге райрÿдышкö илаш кусненыт. Рвезе изиж годсек марла сайын мутлана, кугезына деч куснышо марий йÿлам акла, перега. Кок кочажат гармонист лийын. Аваж велым Кужнур ялыште илыше Михаил кочаже Чылдемыр ялысе «Олык марий» ансамбльыште гармонь дене шоктен. Жапыштыже тудо шочмо ялже нерген мурым шочыктен. Уныкажлан усталык шÿлыш туддечат куснен. Кандаш ияш улмыж годым Дима икымше гана сценышке мураш лектын.

«Тиде Ондроп почиҥга ял пайрем годым лийын. Тушко «Олык марий» ансамбль дене пырля выступатлаш миенам ыле. Кочамын гармонь дене шоктымыж почеш ик марий мурым муралтенам. Но 2014 ийыште кочам Михаил Иванович Кужнуров вес тÿняшке кайыш. Тудын лÿмеш кодшо ийын Чылдемыр клубышто шарныме кас эртаралте. Ты мероприятийыште кокымшо гана сценышке мураш лектынам. Тиддеч вара мураш тÿҥальым.  Марисола школышто Василий Павловым шарныме лÿмеш эртыше «Ныжыл йÿр» да Шернур районын лÿмгечыжлан пöлеклалтше «Кÿдыроҥгыр» муро конкурслаште участвоватленам. Кок вережат кокымшо верым налынам. Кызыт Чылдемыр ялысе «Ший оҥгыр» ансамбльыште сольно мурем, Шернур тÿвыра пöртыштö чӱчкыдын выступатлем», – ойла Д.Веденькин.

 Самырык артист

Дима тÿрлö постановкылаште, спектакльлаште устан модеш. Тидлан кокымшо классыште тунеммыж годым кумылаҥын. Тунам  марий йылме предмет дене почмо урок лийын улмаш. Тушто Дима ик ÿдыр дене пырля «Эй, Маркай, айда, кияр погаш!» постановкышто икымше гана модын. Рвезын талантан улмыжым урокышто шинчыше школ завуч Н.С.Афанасьева шекланен шуктен да 8 Март пайремлан пöлеклалтше школ концертым вÿдаш темлен. Тиддеч вара Дима школысо концертым вÿден.

«Ший оҥгыр» ансамбльым Лариса Михайловна Антропова вуйлата. Тышке 7 ияш гыч 16 ияш марте 18 ÿдыр-рвезе коштеш. Арнялан ик-кок гана погынена. Кызыт финн йомак негызеш «Алвар да ÿмыл» постановкым шындена. Спектакль-влакым эн ончыч шкенан ялыште ончыктенна, каныш годым пошкудо яллашке лектынна», – ойла Дима.

Почеламутым сылнын лудеш

Дима почеламутым, ойлымашым сылнын лудын мошта. Кушто йÿкым кугемдыман, кушто иземдыман – тудо сайын шинча. Почеламутышто кажне шомакым шÿм вошт колта, авторын шонымашыжым еҥ-влаклан мастарын почын пуа. Рвезе 3-шо класс гыч «Живая классика» Россий кӱкшытан сылнымут конкурсышто участвоватла.

«2018 ийыште Шкетанын «Ече» ойлымашыжым лудын, районышто икымше верышке лектым. Вара республикыштат ты ойлымашым лудмем дене ончыл верым нальым. Марий сылнымутлан Шернур посёлкысо школышто марий йылмым туныктышо Лилия Владимировна Волкова кумылаҥден. Тудо почеламутым, прозым сылнын лудаш, тыгак шке гыч почеламутым возаш шÿмаҥден. Тÿҥалтыш класслаште тунеммем годым почеламут-влакым марла возкаленам. Чылаже 9 почеламутем уло. Икмынярже «Кече» журналыште савыкалтын», – ойла Д.Веденькин.

Дима Шернур посёлкысо школышто эртаралтше Яналов лудмаште ик гана веле огыл участвоватлен. Тыште рвезе «Ӱярня. Марий калыкын йÿлаже» проектым арален. Тыгак ты лудмаш годым кажне ийын сылнымут конкурсышко ушна. А кодшо ийын Марий самырык тукым слётышто лийын. Тудо школ деч вара журналистлан тунемаш пураш шона.

15 ияш рвезе дене мутланымеке, виян койыш-шоктышан, ура чонан, чолга улмыжым умылет. Тудо кеч-кунамат жапым пайдалын кучылт мошта. Чылажымат шонен, радамлен ышта, эрласе кечылан ончылгоч ямдылалтеш. Самырык рвезе чыла вере шуаш тырша.