Кодшо тунемме ийын Марий Турек район Сардаял школышто этнокультурный рӱдер шке пашажым тӱҥалын. Тусо пашам Ӱлыл Мосара ял гыч марлан толшо да ты школышто кумшо ий туныктышо О.Е.Алексеева вуйлата. Ольга Евдокимовна – ум пален налаш, шке мастарлыкшым нӧлташ тыршыше чолга педагог.
2019 ийыште тӱҥалтыш класслам туныктышо шке моштымашыжым «Педагогический дебют» районысо да республикысе конкурсышто ончыктен. Тунам Ольга Евдокимовна 4-ше классыште математике урокышто шуко знакан числам пален налме теме дене мозаикым погеныт. Тыге орнамент лектын, марий тӱр пӧръеҥ-влакын аралтышыштым ончыктен. Тиде темым педагог республиклан 100 ий да Сеҥымашлан 75 ий темме дене кылден каласкален.
«2020 ийыште ме йоча-влак дене пырля Сардаялыште илыше ковай-влак деке коштынна, тошто тӱр-влак нерген йодыштынна. Морко районысо Унчо ялысе «Порсын кумыл» усталык студийыш экскурсийыш миенна. Любовь Николаевна Фёдорова мыланна тӱр нерген каласкален. Теве кызыт тудын тӱрлымӧ тувыржым чиенам», – ойла туныктышо.
Ольга Евдокимовна йоча-влаклан «Марий тӱр» кружокым эртара. Эн ончыч марий орнамент-шамычын значенийыштым умылтара. Кружокыш коштшо кандаш ӱдыр чыла значенийым тетрадеш воза, тунемеш. Тылеч вара гына нуно кидшолым, алгам, шӱэш сакыме гердан-шамычым ышташ тунемаш тӱҥалыт. Кодшо ийын туныктышо шкеже ик герданым келыштарен. А йоча-влак дене марий тӱрым бисер дене ыштеныт, алгам ышташ кумылаҥыныт.
Туныктышылан ты пашам ышташ куштылгырак лийже манын, пелашыже Александр Дамианович станокым ыштен пуэн.
«Кажне орнаментын шке значенийже. Теве кид дене тӱрлымӧ тӱр Юмын арулыкшым ончыкта. Тудо осал вий деч арала, маныт. Кодшо ийын йоча-влак эше сӧрастарыме пашаштым тӱҥалыныт веле, ыштен ышт шукто, сандене кызыт ты пашам шуена. Тӱҥжӧ – йоча-влакын кумылышт уло», – каласыш туныктышо.
Оршанке педколледжым тунем пытарымеке, Ольга Евдокимовна Марий Турек район Хлебниково почтышто операторлан пашам ыштен. Но чон вургыжмо годым эре тӱрлен, пидаш да тӱрлаш куд ияшак тунемын. Канвашке, кугу клеткан солыкышко агытаным, чывым, пушеҥгым, пеледышым сӧрастарен. Тыгак ырес дене тӱрлымӧ 20 утла картиныже уло.
Эльвира Терентьева.