31 октябрьыште Йошкар-Оласе Мер-политике рӱдерыште республик кӱкшытан «Ӱдырсий» конкурс 10-шо гана гӱжлыш. Тудым регионысо марий ӱдырамаш-влакын «Саскавий» ушемже эртарен. Тушко Морко, Параньга, Шернур, Кужэҥер, Звенигово районла гыч вич мотор ӱдыр ушнен.
Эн шуко йӱкым поген
Тылеч ончыч конкурсантке-влак шке районысо моторлык конкурсышто вийыштым тергеныт. Тыгак «Саскавий» ушемын ВК-се лаштыкыштыже эртаралтше «Онлайн йӱклымаште» таҥасеныт. Тушто эн шуко лайкым Кужэҥер район Агытансолаште шочын-кушшо Кристина Шапкина (фотошто) поген.
Шкеж нерген ӱдыр тыгерак палдарыш:
– Марий кугыжаныш университетыште биологийым да географийым туныктышылан тунемам. Изи годсек туныктышо лияш шоненам, йоча-влак дене пашам ыштымаш чонемлан лишыл. Садлан ты профессийым ойыренам. «Ӱдырсий» конкурс деч ончыч районысо «Марий ӱдыр – сылне ӱдыр» конкурсышто сеҥышыш лектынам. Садлан республикысе конкурсышто Кужэҥер районемын чапшым аралем.
Мыланем ты мероприятий тыглай огыл. Тудын гоч самырык тукымлан шочмо калыкын тӱвыраже да йӱлаж дене кугешныман манын ончыктынем. Тидлан лӱмын шергашым шылтен модмо тошто марий модышым ямдыленна. Тыгак ӱдыр пурам йӱмаш йӱлам ончыктена.
Мурымаш, куштымаш, йӱлам палымаш
Ӱдыр-влак, кушкын шумекышт, марлан каяш ямде улмышт нерген ӱдырвучым пуалтыме гоч палдареныт. Тыгай сӱрет дене тӱҥалын республикысе «Ӱдырсий» конкурс. Тылеч вара Марий тӱвыра рӱдерын коллективше да Марий кугыжаныш университетысе «Марий сем» ансамбль ожнысо Ӱдырсий йӱлам тошто мурымаш да куштымаш гоч почын пуэн.
Тыгодым конкурсантке-влак шке мастарлыкышт дене палдараш сценыш лекташ ямдылалтыныт. Нуно кидпашалан уста улмыштым, тӱвырам палымыштым, шочмо калыкын кочкышыжым ыштен моштымыштым, йӱлам жаплымыштым ончыктеныт.
Тидлан шкешт нерген палдарыме видеовизиткым ямдыленыт, калык модмашым театрализоватлыме постановко гоч радамленыт, тыгак «Ӱдыр пура» мӧҥгысӧ пашам шке кундемыштлан келшыше муро да куштымаш гоч почын пуэныт.
Поснак куанле ыле ӱдыр-влакым «Этномода» йыжыҥыште эскераш. Тыгодым марий ӱдырын образше мотор вургем да тӱрлӧ сӧрастарыш дене палдырна. Тидыже тудым эшеат сылныракым да сӧралракым ышта. Участнице-шамыч шке кундемыштлан келшыше вургем дене палдареныт. Марий калыкын историйжым, тӱвыражым, йӱлажым палыме шотышто уш-акылым тергыме йыжыҥ, чаманен каласыман, кажне гана кумылым волта. Марий ӱдыр-влак пуйто шке калыкышт нерген огытат пале. Садлан тичмаш вашмут дене йодыш-влаклан вашештен ышт сеҥе. Лач вӱдышӧ-шамычын полшымышт дене икмыняр участнице ойлен керте. А йодыш-влак, каласыман, утыжым неле огытыл ыле.
Сеҥыше – Морко ӱдыр
Жюрин иктешлымыж почеш, икымше вер дене Морко районын чапшым аралыше, Йошкар-Оласе Палантай лӱмеш тӱвыра да сымыктыш колледжын студенткыже Дарья Юрьева палемдалтын. Кокымшо – Параньга район гыч Яна Глушкова. Тудым тыгак «Ушанче» номинацийыште ойыреныт. Ӱдыр Йошкар-Оласе Столичный базовый колледжыште тунемеш. Кумшо – Шернур кундемын Пампалчыже, Марий кугыжаныш университетын студенткыже – Анна Прохорова. Анна тыгак «Поро кумылан» номинацийыште палемдалтын. «Этномода» номинацийыште Звенигово район гыч Марина Александрова сеҥен. Тудо Звенигово оласе транспортно-энергетический техникумышто логистике направлений почеш профессионал шинчымашым налеш.
Ты кечын сценыште ятыр марий муро, куштымаш, модмаш, йӱла, моторлык ончыкталтыныт. Самырык ӱдыр-влакын конкурслан ямдылалтмыштат шижалте. Вет нунын дене пырля ик сценыште шке шочмо кундемысе ансамбль-влакат выступатленыт. Палемдыман, ты конкурс, чынжымак, самырык еҥ-шамычым калыкын йӱлажым палымылан да тӱвыражым нӧлтымылан кумылаҥда. Но тыгодым шарныман: историйым палыде, тидым ышташ огеш лий. Садлан айста, ӱдыр-влак, шке шочмо кундемнан историйжым шымлымыланат утларак тӱткышым ойырена.
Иван Речкинын фотожо-влак.