МарГУ-што тунемше Татьяна Кудряшова кушташ мастар. Тыгак тудо чолга, сайын тунемеш – тидлан кӧра ӱдыр тений Йошкар-Оласе мэрын стипендианткыже лӱмым нумалеш.
Шернур район Глазырин ялеш шочын-кушшо да кызыт МарГУ-што тунемше Татьяна Кудряшова — марий калыкын йытыра ӱдыржӧ. Тиде мотор, уста, чолга да пашаче студенткын фотосӱретшым марий калык нерген каласкалыше тӱрлӧ журналеш вераҥдат.
Татьяна чынжымак чолга. 2017 ийыште И.С.Палантай лӱмеш тӱвыра да сымыктыш колледжын хореографический пӧлкажым тунем лектын. Тунам ӱдыр «Вдохновение», «Марий памаш» ансамбльлаште куштен. МарГУ-ш тунемаш толмеке, «Цармис» куштымаш театрыш, «Salika» шоу-балетыш коштын. Кызыт тудо Йошкар-Оласе 3-шо №-ан школышто «Fordkids» йоча студийыште педагоглан пашам ышта. Тений Т.Кудряшова «Руководитель любительских и творческих коллективов» специальность дене дипломым налшаш. Тылеч вара тудо йӧратыме пашажым шукташ шокшым кергалтен пижаш шона.
УМБАКЫЖЕ «КУГАРНЯ» газетыште (2021 ий 22 январь) лудса.»
Эльвира Терентьева.
Иван Речкинын фотожо.